ಕನ್ನಡ ಸುದ್ದಿ  /  Cricket  /  Sunil Narine Venkatesh Iyer Fire Kolkata Knight Riders To 7 Wicket Win Vs Royal Challengers Bengaluru Virat Kohli Prs

ಕಳಪೆ ಬೌಲಿಂಗ್​ಗೆ ಬೆಲೆತೆತ್ತ ಆರ್​​ಸಿಬಿಗೆ 2ನೇ ಸೋಲು; ಕೋಲ್ಕತ್ತಾ ನೈಟ್​ ರೈಡರ್ಸ್​ಗೆ 7 ವಿಕೆಟ್​​ ಭರ್ಜರಿ ಜಯ

RCB vs KKR : ಕಳೆದ ಬ್ಯಾಟಿಂಗ್​ ಮತ್ತು ಫೀಲ್ಡಿಂಗ್​ನಿಂದ ಬೆಲೆತೆತ್ತ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ವಿರುದ್ಧ 7 ವಿಕೆಟ್​​ಗಳ ಹೀನಾಯ ಸೋಲು ಕಂಡಿತು.

ಕೋಲ್ಕತ್ತಾ ನೈಟ್​ ರೈಡರ್ಸ್​ಗೆ 7 ವಿಕೆಟ್​​ ಭರ್ಜರಿ ಜಯ
ಕೋಲ್ಕತ್ತಾ ನೈಟ್​ ರೈಡರ್ಸ್​ಗೆ 7 ವಿಕೆಟ್​​ ಭರ್ಜರಿ ಜಯ (PTI)

ವಿರಾಟ್ ಕೊಹ್ಲಿ ಅವರ ಹೋರಾಟದ ಹೊರತಾಗಿಯೂ ಕೋಲ್ಕತ್ತಾ ನೈಟ್​ ರೈಡರ್ಸ್ ಆಲ್​ರೌಂಡ್​ ಆಟದೆದುರು ಉಸಿರೆತ್ತದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತವರಿನಲ್ಲಿ ಮೊದಲ ಸೋಲಿಗೆ ಶರಣಾಗಿದೆ. ಚಿನ್ನಸ್ವಾಮಿ ಮೈದಾನದಲ್ಲಿ ನಡೆದ ಮೆಗಾ ಫೈಟ್​​ನಲ್ಲಿ ಕಳಪೆ ಫೀಲ್ಡಿಂಗ್, ಬೌಲಿಂಗ್​ಗೆ ಭಾರಿ ಬೆಲೆತೆತ್ತ ಆರ್​ಸಿಬಿ, 7 ವಿಕೆಟ್​ಗಳಿಂದ ಸೋಲೊಪ್ಪಿಕೊಂಡಿತು. ಲಯಕ್ಕೆ ಮರಳಿದ್ದ ಆರ್​ಸಿಬಿ 2ನೇ ಸೋಲು ಅನುಭವಿಸಿದ್ದರೆ, ಕೆಕೆಆರ್​ ಸತತ 2ನೇ ಜಯದೊಂದಿಗೆ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಆರ್​ಸಿಬಿ, ಅದ್ಭುತ ಆರಂಭ ಪಡೆದರೂ ಅದೇ ಪ್ರದರ್ಶನವನ್ನು ಕೊನೆಯವರೆಗೂ ಮುಂದುವರೆಸಲು ವಿಫಲವಾಯಿತು. ವಿರಾಟ್ ಏಕಾಂಗಿ ಹೋರಾಟ ನಡೆಸಿದ ಪರಿಣಾಮ 20 ಓವರ್​​​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 182 ರನ್ ಗಳಿಸಿತು. ಈ ಗುರಿ ಹಿಂಬಾಲಿಸಿದ ಕೋಲ್ಕತ್ತಾ, ಸಿಡಿಲಬ್ಬದ ಬ್ಯಾಟಿಂಗ್​ ನಡೆಸಿತು. ಇನ್ನೂ 19 ಎಸೆತಗಳು ಬಾಕಿ ಇರುವಂತೆಯೇ ಟೂರ್ನಿಯಲ್ಲಿ ಸತತ ಎರಡನೇ ಗೆಲುವು ದಾಖಲಿಸಿತು.

ಭರ್ಜರಿ ಆರಂಭ ಪಡೆದ ಕೆಕೆಆರ್​

ಸವಾಲಿನ ಮೊತ್ತವನ್ನು ಚೇಸ್ ಮಾಡಿದ ಕೆಕೆಆರ್​ಗೆ ಅತ್ಯುತ್ತಮ ಆರಂಭ ದೊರೆಯಿತು. ಸುನಿಲ್ ನರೇನ್ ಮತ್ತು ಫಿಲ್ ಸಾಲ್ಟ್​ ಆಕ್ರಮಣಕಾರಿ ಆಟದೊಂದಿಗೆ ಪವರ್​​ಪ್ಲೇನಲ್ಲಿ 85 ರನ್ ಕಲೆ ಹಾಕಿತು. ಈ ಸ್ಕೋರ್​ ಪಂದ್ಯದ ಚಿತ್ರಣವನ್ನೇ ಬದಲಿಸಿತು. ಕೆಕೆಆರ್​ ಬ್ಯಾಟಿಂಗ್ ಅಬ್ಬರಕ್ಕೆ ಆರ್​​ಸಿಬಿ ಬೌಲರ್​​​ಗಳು ಕಡಿವಾಣ ಹಾಕಲು ವಿಫಲರಾದರು. ಆರು ಓವರ್​ಗಳ ನಂತರ ಆರ್ಭಟಿಸುತ್ತಿದ್ದ ನರೇನ್ 22 ಎಸೆತಗಳಲ್ಲಿ 2 ಬೌಂಡರಿ, 5 ಸಿಕ್ಸರ್ ಸಹಿತ 47 ರನ್ ಚಚ್ಚಿದರು.

ನರೇನ್ ಬೆನ್ನಲ್ಲೇ 30ರನ್ ಗಳಿಸಿದ್ದ ಸಾಲ್ಟ್ ಕೂಡ ಔಟಾದರು. ಆದರೆ ಇಬ್ಬರು ಔಟಾಗಿದ್ದು ಕೆಕೆಆರ್​ ಮೇಲೆ ಯಾವುದೇ ಪರಿಣಾಮ ಬೀರಲಿಲ್ಲ. ಆರಂಭಿಕರು ಔಟಾದ ಬಳಿಕ ಮೂರನೇ ಕ್ರಮಾಂಕದಲ್ಲಿ ಆಡಿದ ವೆಂಕಟೇಶ್ ಅಯ್ಯರ್, ಆರ್​ಸಿಬಿ ಮೇಲೆ ಸವಾರಿ ಮಾಡಿದರು. ಓಪನರ್ಸ್ ಭರ್ಜರಿ ಭದ್ರಬುನಾದಿ ಹಾಕಿಕೊಟ್ಟ ಕಾರಣ ವೆಂಕಿ, ಒತ್ತಡ ಮುಕ್ತರಾಗಿ ಬ್ಯಾಟ್ ಬೀಸಿದರು. ಬಿರುಸಿನ ಬ್ಯಾಟಿಂಗ್ ನಡೆಸಿದ ಎಡಗೈ ಆಟಗಾರ, 30 ಎಸೆತಗಳಲ್ಲೇ 50ರ ಗಟಿ ದಾಟಿದರು.

ವೆಂಕಟೇಶ್​ಗೆ ಸಖತ್ ಸಾಥ್ ನೀಡಿದ ಶ್ರೇಯಸ್ ಅಯ್ಯರ್ ಅಜೇಯ 39 ರನ್ ಕಲೆ ಹಾಕಿದರು. ಆಟಗಾರರ ಅದ್ಭುತ ಪ್ರದರ್ಶನದ ಕಾರಣ ಕೋಲ್ಕತ್ತಾ 16.5 ಓವರ್​​ಗಳಲ್ಲಿ ಆರ್​ಸಿಬಿ ವಿರುದ್ಧ ಗೆದ್ದು ಬೀಗಿತು. ಮಯಾಂಕ್ ಡಾಗರ್, ವಿಜಯ್ ಕುಮಾರ್​ ವೈಶಾಕ್ ಮತ್ತು ಯಶ್ ದಯಾಳ್ ತಲಾ ಒಂದೊಂದು ವಿಕೆಟ್ ಪಡೆದರು.

ವಿರಾಟ್ ಕೊಹ್ಲಿ ಹೋರಾಟ

ಮೊದಲು ಬ್ಯಾಟಿಂಗ್ ನಡೆಸಿದ ಬೆಂಗಳೂರು, ಫಾಫ್ ಡು ಪ್ಲೆಸಿಸ್ (8)​ ಬೇಗನೇ ಔಟಾದರೂ ಭರ್ಜರಿ ಆರಂಭ ಪಡೆಯಿತು. ವಿರಾಟ್ ಕೊಹ್ಲಿ ಮತ್ತು ಕ್ಯಾಮರೂನ್ ಗ್ರೀನ್​ ಪವರ್​​​ಪ್ಲೇನಲ್ಲಿ 61 ರನ್​ ಕಲೆ ಹಾಕಿ ಉತ್ತಮ ಭದ್ರಬುನಾದಿ ಹಾಕಿಕೊಟ್ಟರು. ಜೊತೆಗೆ ಎರಡನೇ ವಿಕೆಟ್​ಗೆ ಅರ್ಧಶತಕದ ಜೊತೆಯಾಟವನ್ನೂ ಆಡಿದರು. ಆದರೆ ಸಿಡಿಯುತ್ತಿದ್ದ ಗ್ರೀನ್ (33), ಆಂಡ್ರೆ ರಸೆಲ್ ಬೌಲಿಂಗ್​ನಲ್ಲಿ ಕ್ಲೀನ್​ ಬೌಲ್ಡ್ ಆದರು.

ಕಳೆದ ಎರಡು ಪಂದ್ಯಗಳಿಂದ ವೈಫಲ್ಯ ಅನುಭವಿಸಿದ್ದ ಮ್ಯಾಕ್ಸ್​ವೆಲ್ ಎರಡು ಜೀವದಾನ ಪಡೆದರೂ ಅದನ್ನು ದೊಡ್ಡ ಇನ್ನಿಂಗ್ಸ್​ ಆಗಿ ಪರಿವರ್ತಿಸಲು ವಿಫಲರಾದರು. ಮ್ಯಾಕ್ಸಿ 28 ರನ್ ಗಳಿಸಿ ಸುನಿಲ್ ನರೇನ್​ಗೆ ವಿಕೆಟ್ ಒಪ್ಪಿಸಿದರು. ರಜತ್ ಪಾಟೀದಾರ್ (3) ಮತ್ತೆ ನಿರಾಸೆ ಮೂಡಿಸಿದರು. ಮೊದಲ ಪಂದ್ಯದಲ್ಲಿ ಆರ್ಭಟಿಸಿದ್ದ ಅನೂಜ್ ರಾವತ್ 3 ರನ್ ಗಳಿಸಿ ಔಟಾದರು. ಆದರೆ ಸತತ ವಿಕೆಟ್​​ಗಳ ನಡುವೆಯೂ ಏಕಾಂಗಿ ಹೋರಾಟ ನಡೆಸಿದ ಕೊಹ್ಲಿ ಅಜೇಯರಾಗಿ ಉಳಿದರು.

ವಿರಾಟ್ 59 ಎಸೆತಗಳಲ್ಲಿ 4 ಬೌಂಡರಿ, 4 ಸಿಕ್ಸರ್​ ಸಹಿತ 83 ರನ್ ಗಳಿಸಿ ತಂಡವನ್ನು ಮೊತ್ತವನ್ನು 180ರ ಗಡಿ ದಾಟಿಸಿದರು. ಕೊನೆಯಲ್ಲಿ ದಿನೇಶ್ ಕಾರ್ತಿಕ್ ಅಜೇಯ 20 ರನ್ ಗಳಿಸಿ ಸಾಥ್ ನೀಡಿದರು. ಕೆಕೆಆರ್​ ಪರ ರಸೆಲ್ ಮತ್ತು ಹರ್ಷಿತ್ ರಾಣಾ ತಲಾ 2 ವಿಕೆಟ್, ಸುನಿಲ್ ನರೇನ್ 1 ವಿಕೆಟ್ ಪಡೆದರು. ಬೌಲಿಂಗ್​ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದರ ಜತೆಗೆ ಕೆಕೆಆರ್​ ಫೀಲ್ಡಿಂಗ್​ನಲ್ಲೂ ಸುಮಾರು 20 ರನ್​ಗಳವರೆಗೂ ರಕ್ಷಿಸಿತು.