Team India: ತಲಾ ಅರ್ಧಶತಕ ಸಿಡಿಸಿ ಹಲವು ದಾಖಲೆ ನಿರ್ಮಿಸಿದ ರೋಹಿತ್​, ಜೈಸ್ವಾಲ್, ಕೊಹ್ಲಿ; ಯಾವೆಲ್ಲಾ ರೆಕಾರ್ಡ್ಸ್ ನಿರ್ಮಾಣವಾದವು ನೋಡಿ

ಟ್ರಿನಿಡಾಡ್​ನ ಪೋರ್ಟ್​ ಆಫ್ ಸ್ಪೇನ್​ನಲ್ಲಿ ಜರುಗುತ್ತಿರುವ ವೆಸ್ಟ್​ ಇಂಡೀಸ್​ ವಿರುದ್ಧದ 2ನೇ ಟೆಸ್ಟ್‌ನಲ್ಲಿ ಭಾರತ ಉತ್ತಮ ಪ್ರದರ್ಶನ ಮುಂದುವರಿಸಿದೆ. ಟೀಮ್​ ಇಂಡಿಯಾ ಬೃಹತ್​ ಮೊತ್ತ ಕಲೆ ಹಾಕುವ ಲೆಕ್ಕಾಚಾರದಲ್ಲಿದೆ. ಮೊದಲ ದಿನದಾಟದ ಅಂತ್ಯಕ್ಕೆ 4 ವಿಕೆಟ್​ ಕಳೆದುಕೊಂಡು 288 ರನ್ ಗಳಿಸಿದೆ.

ರೋಹಿತ್​ ಶರ್ಮಾ 80, ಯಶಸ್ವಿ ಜೈಸ್ವಾಲ್ 57, ವಿರಾಟ್ ಕೊಹ್ಲಿ ಅಜೇಯ 87 ರನ್, ಜಡೇಜಾ ಅಜೇಯ 36 ರನ್ ಗಳಿಸಿದ್ದಾರೆ. ಅರ್ಧಶತಕ ಸಿಡಿಸಿದ ಜೈಸ್ವಾಲ್, ರೋಹಿತ್​, ಕೊಹ್ಲಿ ದಾಖಲೆಗಳ ಜಾತ್ರೆ ನಡೆಸಿದ್ದಾರೆ. 2ನೇ ಟೆಸ್ಟ್​ ಪಂದ್ಯದಲ್ಲಿ ಹಲವು ದಾಖಲೆಗಳು ಸೃಷ್ಟಿಯಾಗಿದ್ದು ಯಾವುವು ಎಂಬುದನ್ನು ಈ ಕೆಳಕಂಡಂತೆ ನೋಡೋಣ.

• ಮೊದಲ ಇನಿಂಗ್ಸ್‌ನಲ್ಲಿ 80 ರನ್ ಸಿಡಿಸಿದ ರೋಹಿತ್​ ಶರ್ಮಾ, ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಕಲೆಹಾಕಿದ 5ನೇ ಭಾರತೀಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಪ್ರಸ್ತುತ ರೋಹಿತ್ ಖಾತೆಯಲ್ಲಿ 17298 ರನ್‌ಗಳಿವೆ. ಆ ಮೂಲಕ ಎಂಎಸ್ ಧೋನಿ (17266) ಮತ್ತು ವೀರೇಂದ್ರ ಸೆಹ್ವಾಗ್‌ (17253 ) ಅವರ ದಾಖಲೆಯನ್ನು ಹಿಂದಿಕ್ಕಿದ್ದಾರೆ.
• ವೆಸ್ಟ್​ ಇಂಡೀಸ್​​ನ ಪೋರ್ಟ್​ ಆಫ್​ ಸ್ಪೇನ್​ ಮೈದಾನದಲ್ಲಿ ನಡೆದ 2ನೇ ಟೆಸ್ಟ್​​ನಲ್ಲಿ 139 ರನ್​ಗಳ ಜೊತೆಯಾಟವಾಡಿದ ರೋಹಿತ್-ಜೈಸ್ವಾಲ್ ಜೋಡಿ ಮತ್ತೊಂದು ದಾಖಲೆ ಬರೆದಿದೆ. ಈ ಮೈದಾನದಲ್ಲಿ ಅತ್ಯಧಿಕ ಆರಂಭಿಕ ಜೊತೆಯಾಟವಾಡಿದ ವಿಶ್ವದ 3ನೇ ಜೋಡಿ ಎಂಬ ದಾಖಲೆ ನಿರ್ಮಿಸಿದೆ. ಮೊದಲ ಸ್ಥಾನದಲ್ಲಿ ಇಂಗ್ಲೆಂಡ್​ನ ಜಿಯೋಫರಿ ಬಾಯ್ಕಾಟ್ ಮತ್ತು ಡೆನ್ನಿಸ್ ಅಮಿಸ್​ ಜೋಡಿ ಇದ್ದು, 1974ರಲ್ಲಿ 209ರನ್ ಆರಂಭಿಕ ಜೊತೆಯಾಟವಾಡಿತ್ತು. ಆಸ್ಟ್ರೇಲಿಯಾದ ಆರ್ಥರ್ ಮೋರಿಸ್ ಮತ್ತು ಕಾಲಿನ್ ಮೆಕ್‌ಡೊನಾಲ್ಡ್ ಜೋಡಿ 2ನೇ ಸ್ಥಾನದಲ್ಲಿದೆ. ಇವರಿಂದ 191 ರನ್​ಗಳ ಆರಂಭಿಕ ಜೊತೆಯಾ ಬಂದಿತ್ತು.
• ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ನಲ್ಲಿ ರೋಹಿತ್​​ ಶರ್ಮಾ 2000 ರನ್​ಗಳ ಸಾಧನೆ ಮಾಡಿದರು. ಈ ಸಾಧನೆ ಮಾಡಿದ ಭಾರತದ ಮೊದಲ ಆಟಗಾರ. ಅವರ ಬ್ಯಾಟಿಂಗ್ ಸರಾಸರಿ 53. ರೋಹಿತ್ ಬೆನ್ನಲ್ಲೇ ಇದೇ ಪಂದ್ಯದಲ್ಲಿ ಅಜೇಯ 87 ರನ್ ಗಳಿಸಿರುವ ವಿರಾಟ್ ಕೊಹ್ಲಿ ಕೂಡ 2000 ರನ್​ ಪೂರೈಸಿದರು. ಆ ಮೂಲಕ ಈ ಸಾಧನೆ ಮಾಡಿದ ಎರಡನೇ ಭಾರತೀಯ ಎನಿಸಿದರು.
• ರೋಹಿತ್​ ಶರ್ಮಾ ಮತ್ತೊಮ್ಮೆ ಸಿಕ್ಸರ್ ಕಿಂಗ್ ಎಂಬುದನ್ನು ನಿರೂಪಿಸಿದರು. ಈ ಪಂದ್ಯದಲ್ಲಿ 2 ಸಿಕ್ಸರ್​ ಬಾರಿಸಿದ ಹಿಟ್​ಮ್ಯಾನ್ ನಾಯಕನಾಗಿ 150 ಸಿಕ್ಸರ್​ಗಳನ್ನು ಪೂರೈಸಿದರು.
• ವಿರಾಟ್ ಕೊಹ್ಲಿ 500ನೇ ಅಂತಾರಾಷ್ಟ್ರೀಯ ಪಂದ್ಯವಾಡುವ ಮೂಲಕ ಪಂದ್ಯದಲ್ಲಿ ದಾಖಲೆ ಬರೆದರು. ಈ ಸಾಧನೆ ಮಾಡಿದ 10ನೇ ಆಟಗಾರ ಎನಿಸಿದರು. ಭಾರತದ ಪರ 4ನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.
• ಅಂತಾರಾಷ್ಟ್ರೀಯ ಕ್ರಿಕೆಟ್​ನ 500ನೇ ಪಂದ್ಯದಲ್ಲಿ ಅರ್ಧಶತಕ ಬಾರಿಸಿದ ವಿಶ್ವದ ಮೊದಲ ಆಟಗಾರ ಎಂಬ ದಾಖಲೆಗೂ ಕೊಹ್ಲಿ ಪಾತ್ರರಾಗಿದ್ದಾರೆ. ದಿಗ್ಗಜರಾಜ ಸಚಿನ್, ಪಾಟಿಂಗ್​ ಸೇರಿದಂತೆ ಹಲವರು 500ನೇ ಪಂದ್ಯದಲ್ಲಿ 50ರ ಗಡಿ ದಾಟಿರಲಿಲ್ಲ.
• ಅಜೇಯ 87 ರನ್​ ಸಿಡಿಸಿ 2ನೇ ದಿನದಾಟಕ್ಕೆ ಕ್ರೀಸ್​ ಕಾಯ್ದುಕೊಂಡಿರುವ ಕೊಹ್ಲಿ, 4ನೇ ಕ್ರಮಾಂಕದಲ್ಲಿ ಅಧಿಕ ರನ್ ಗಳಿಸಿದ ಅಂತಾರಾಷ್ಟ್ರೀಯ ಕ್ರಿಕೆಟ್​ನ 5ನೇ ಆಟಗಾರ ಎಂಬ ಹೆಗ್ಗೆಳಿಕೆಗೆ ಪಾತ್ರರಾಗಿದ್ದಾರೆ. 4ನೇ ಕ್ರಮಾಂಕದಲ್ಲಿ ಸಚಿನ್ ತೆಂಡೂಲ್ಕರ್​ 13,492 ರನ್​ ಗಳಿಸಿ ಅಗ್ರಸ್ಥಾನದಲ್ಲಿದ್ದಾರೆ. ಮಹೇಲಾ ಜಯವರ್ಧನೆ 9509 ರನ್, ಜಾಕ್ ಕಾಲಿಸ್ 9033 ರನ್, ಬ್ರಿಯಾನ್ ಲಾರಾ 7535 ರನ್, ಕೊಹ್ಲಿ7097 ರನ್ ಗಳಿಸಿ 2, 3, 4, 5ನೇ ಸ್ಥಾನದಲ್ಲಿದ್ದಾರೆ.
• ವಿರಾಟ್ ಕೊಹ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ 5 ನೇ ಆಟಗಾರ ಎಂಬ ದಾಖಲೆಗೂ ಒಳಗಾಗಿದ್ದಾರೆ. ಸಚಿನ್ 34357 ರನ್​ಗಳಿಸಿ ಮೊದಲ ಸ್ಥಾನದಲ್ಲಿದ್ದಾರೆ. ಕುಮಾರ್ ಸಂಗಕ್ಕಾರ 28016 ರನ್, ರಿಕಿ ಪಾಂಟಿಂಗ್ 27483 ರನ್​, ಜಯವರ್ಧನೆ 25957 ರನ್, ಕೊಹ್ಲಿ 25548 ರನ್​​ ಗಳಿಸಿ ಕ್ರಮವಾಗಿ 2, 3, 4, 5ನೇ ಸ್ಥಾನದಲ್ಲಿದ್ದಾರೆ. ಜಾಕ್​ ಕಾಲಿಸ್ ಅವರ ದಾಖಲೆ ಮುರಿದು ಈ ಸಾಧನೆ ಮಾಡಿದರು.