ಹೊಸ ವರ್ಷಕ್ಕೆ ಗೆಲುವಿನ ಸಿಹಿ ನೀಡಿದ ಬೆಂಗಳೂರು ಬುಲ್ಸ್; ಗೆದ್ದು ಅಗ್ರಸ್ಥಾನಕ್ಕೇರಿದ ಗುಜರಾತ್

2023 ವರ್ಷದ ಕೊನೆಯ ದಿನದಂದು ನಡೆದ ಡಬಲ್​ ಹೆಡ್ಡರ್ ಪಂದ್ಯದಲ್ಲಿ ಒಂದು ಅಂಕದ ಗೆಲುವಿನೊಂದಿಗೆ ಗೆದ್ದ ಬೆಂಗಳೂರು ಬುಲ್ಸ್​, ಹೊಸ ವರ್ಷಕ್ಕೆ ಉಡುಗೊರೆ ನೀಡಿದೆ. ಸತತ 2 ಸೋಲುಗಳ ನಂತರ ಮತ್ತೆ ಲಯಕ್ಕೆ ಮರಳಿದೆ. ಅಲ್ಲದೆ, 10ನೇ ಅಂಕಪಟ್ಟಿಯಲ್ಲಿ 10ನೇ ಸ್ಥಾನದಲ್ಲಿದ್ದ ಬುಲ್ಸ್​, 6ನೇ ಲಗ್ಗೆಯಿಟ್ಟಿದೆ. ತಮಿಳ್ ತಲೈವಾಸ್ ವಿರುದ್ಧ 37-38 ಅಂಕಗಳಿಂದ ರಣರೋಚಕ ಗೆಲುವು ಸಾಧಿಸಿದೆ.

ಶಾಹೀದ್ ವಿಜಯ್ ಸಿಂಗ್ ಪಥಿಕ್ ಕ್ರೀಡಾ ಸಂಕೀರ್ಣದಲ್ಲಿ ಜರುಗಿದ ಲೀಗ್​​ನ 50ನೇ ಪಂದ್ಯದಲ್ಲಿ ತಮಿಳ್ ತಲೈವಾಸ್ ಎದುರು ಅದ್ಭುತ ಹೋರಾಟ ನಡೆಸಿತು. ತಮಿಳ್ ತಂಡ ನೀಡಿದ ಪ್ರಬಲ ಹೋರಾಟದ ನಡುವೆ ಮೈಕೊಡವಿ ನಿಂತ ಗೂಳಿಗಳು ಲೀಗ್​ನಲ್ಲಿ 4ನೇ ಜಯದ ನಗೆ ಬೀರಿದರು. ಒಂದು ಹಂತದಲ್ಲಿ ಸೋಲುವ ಭೀತಿಗೆ ಒಳಗಾಗಿದ್ದ ಬುಲ್ಸ್, ನಂತರ ಬಲವಾಗಿ ಪುನರಾಗಮನ ಮಾಡಿ ಎದುರಾಳಿ ಆಘಾತ ನೀಡಿತು.

ಮೈ ಕೊಡವಿ ನಿಂತ ಬುಲ್ಸ್

ಬೆಂಗಳೂರು ಪರ ಭರತ್ ಮತ್ತೆ ಮಿಂಚಿದರು. 4 ಬೋನಸ್ ಸೇರಿ 9 ರೇಡಿಂಗ್​ ಅಂಕಗಳನ್ನು ಪಡೆದು ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ನೀರಜ್ ನರ್ವಾಲ್ 5, ವಿಕಾಸ್ ಖಂಡೋಸ್, ಪರ್ತೀಕ್, ಸೌರಭ್ ನಂದಲ್ ತಲಾ ಅಂಕ ಪಡೆದರು. ಸುರ್ಜೀತ್​ ಸಿಂಗ್, ಸಚಿನ್ ನರ್ವಾಲ್ ತಲಾ 3 ಅಂಕ ಪಡೆದರು. ಅಮನ್ 1 ಅಂಕ ಗಳಿಸಿದರು. ಅಂಕಪಟ್ಟಿಯಲ್ಲಿ 25 ಅಂಕ ಪಡೆದಿದೆ.

ತಮಿಳ್ ತಲೈವಾಸ್ ಮತ್ತೊಂದು ರೋಚಕ ಸೋಲು ಅನುಭವಿಸಿದೆ. ಗೆಲುವಿನ ಅಂಚಿನಲ್ಲಿ ಶರಣಾಗಿದೆ. ನರೇಂದರ್ ಹೋಶಿಯರ್​ 12 ಅಂಕ ಪಡೆದು ಅದ್ಭುತ ಪ್ರದರ್ಶನ ನೀಡಿದ್ದರ ಹೊರತಾಗಿಯೂ ಗೆಲುವು ಸಿಗಲಿಲ್ಲ. ಅಜಿಂಕ್ಯ ಪವಾರ್ 6, ನಿತಿನ್ ಸಿಂಗ್, ಸಾಗರ್ ತಲಾ 5 ಅಂಕ ಪಡೆದರೂ ನಿರಾಸೆ ಅನುಭವಿಸಿದರು. ತಮಿಳ್ ತಂಡ ಲೀಗ್​​ನಲ್ಲಿ 7 ಸೋಲು ಕಂಡಿದೆ. ಅಂಕಪಟ್ಟಿಯಲ್ಲಿ 11ನೇ ಸ್ಥಾನದಲ್ಲಿದೆ.

ಗುಜರಾತ್​​ಗೆ ಭರ್ಜರಿ ಗೆಲುವು

ಇನ್ನು ಡಿಸೆಂಬರ್​ 31ರಂದು ಮತ್ತೊಂದು ಪಂದ್ಯದಲ್ಲಿ ಬೆಂಗಾಲ್ ವಾರಿಯರ್ಸ್ ಎದುರು ಗೆದ್ದ ಗುಜರಾತ್ ಜೈಂಟ್ಸ್ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಈ ಪಂದ್ಯದಲ್ಲಿ ಗುಜರಾತ್ 51-42 ಅಂಕಗಳಿಂದ ಭರ್ಜರಿ ಜಯ ಸಾಧಿಸಿತು. ಆ ಮೂಲಕ ಲೀಗ್​ನಲ್ಲಿ 6ನೇ ಗೆಲುವನ್ನು ತನ್ನದಾಗಿಸಿಕೊಂಡಿತು. ಒಟ್ಟು 33 ಅಂಕ ಸಂಪಾದಿಸಿದೆ. ಇನ್ನು ಸೋತ ಬೆಂಗಾಲ್ ವಾರಿಯರ್ಸ್ 9ನೇ ಸ್ಥಾನಕ್ಕೆ ಕುಸಿತ ಕಂಡಿದೆ.