ಪಲ್ಟನ್ಸ್ ವಿರುದ್ಧ ಪಲ್ಟಿ ಹೊಡೆದ ಬೆಂಗಳೂರು ಬುಲ್ಸ್​ಗೆ 5ನೇ ಸೋಲು; ಯುಪಿ ಯೋಧಾಸ್ ಮಣಿಸಿದ ಜೈಪುರ

ಬರೋಬ್ಬರಿ ಒಂದು ವಾರದ ಬಳಿಕ ಕಣಕ್ಕಿಳಿದ ಬೆಂಗಳೂರು ಬುಲ್ಸ್, ಪ್ರೊ ಕಬಡ್ಡಿ ಲೀಗ್​ 10ನೇ ಆವೃತ್ತಿಯಲ್ಲಿ ಐದನೇ ಸೋಲಿಗೆ ಶರಣಾಗಿದೆ. ಪುಣೇರಿ ಪಲ್ಟನ್ಸ್ ಎದುರು 25 ಅಂಕಗಳ (43-18) ಭಾರಿ ಅಂತರದಿಂದ ಮಕಾಡೆ ಮಲಗಿರುವ ಬುಲ್ಸ್ (Puneri Paltan vs Bengaluru Bulls), ಪಾಯಿಂಟ್ಸ್​​ ಟೇಬಲ್​ನಲ್ಲಿ ಕೆಳಕ್ಕೆ ಜಾರಿದೆ. ಭರ್ಜರಿ ಗೆಲುವು ದಾಖಲಿಸಿದ ಪಲ್ಟನ್ಸ್ ಅಗ್ರಸ್ಥಾನವನ್ನು ಗಟ್ಟಿಗೊಳಿಸಿದೆ.

ಇದನ್ನೂ ಓದಿ: ಭಾರತ vs ಆಸ್ಟ್ರೇಲಿಯಾ ವನಿತೆಯರ ಸರಣಿ; ವೇಳಾಪಟ್ಟಿ, ತಂಡ ಮತ್ತು ಲೈವ್ ಸ್ಟ್ರೀಮಿಂಗ್ ವಿವರ ಹೀಗಿದೆ

ಡಿಸೆಂಬರ್ 20ರ ರಾತ್ರಿ ನಡೆದ ಎರಡನೇ ಪಂದ್ಯದಲ್ಲಿ ಬೆಂಗಳೂರು ಹೀನಾಯ ಸೋಲು ಕಂಡರೆ, ದಿನದ ಮೊದಲ ಪಂದ್ಯದಲ್ಲಿ ಯುಪಿ ಯೋಧಾಸ್ ತಂಡದ ವಿರುದ್ಧ 17 ಪಾಯಿಂಟ್ಸ್​ಗಳ (41-24) ಅಂತರದಿಂದ ಹಾಲಿ ಚಾಂಪಿಯನ್​ ಜೈಪುರ ಪಿಂಕ್​ ಪ್ಯಾಂಥರ್ಸ್ (Jaipur Pink Panthers vs UP Yoddhas)​ ಗೆದ್ದು ಬೀಗಿದೆ. ಇದರೊಂದಿಗೆ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿದೆ.

ನಿರಾಸೆ ಮೂಡಿಸಿದ ಬುಲ್ಸ್ ಆಟಗಾರರು

ಆರಂಭಿಕ 4 ಪಂದ್ಯಗಳಲ್ಲಿ ಸೋತಿದ್ದ ಬೆಂಗಳೂರು ಬುಲ್ಸ್​ ಬಳಿಕ ಸತತ 2ರಲ್ಲಿ ಗೆಲುವು ಸಾಧಿಸಿ ಲಯಕ್ಕೆ ಮರಳಿತ್ತು. ವಿಶ್ವಾಸ ಹೆಚ್ಚಿಸಿಕೊಂಡ ಬುಲ್ಸ್ ಮೇಲೆ ನಿರೀಕ್ಷೆ ಹೆಚ್ಚಾಗಿತ್ತು. ಆದರೆ ಮತ್ತೆ ಸೋಲನುಭವಿಸಿತು. ರೋಹಿತ್ ನಂದಲ್, ವಿಕಾಸ್ ಖಂಡೋಲಾ, ಭರತ್ ಸೇರಿದಂತೆ ಯಾರೂ ಸಹ ನಿರೀಕ್ಷಿತ ಪ್ರದರ್ಶನ ನೀಡಲಿಲ್ಲ. ಈ ಸೋಲಿನಿಂದ ಅಂಕ ಪಟ್ಟಿಯಲ್ಲಿ ಕುಸಿದಿದೆ. 14 ಅಂಕ ಪಡೆದು 8ನೇ ಸ್ಥಾನದಲ್ಲಿದೆ.

ಮತ್ತೊಂದೆಡೆ ಖಡಕ್ ಆಟ ಪ್ರದರ್ಶಿಸಿದ ಪುಣೇರಿ, ಲೀಗ್​ನಲ್ಲಿ 5ನೇ ಗೆಲುವಿಗೆ ಮುತ್ತಿಕ್ಕಿದೆ. ಮೋಹಿತ್​ ಗೋಯತ್ (8), ಮೊಹಮ್ಮದ್ರೇಜಾ ಶಾಡ್ಲೂಯಿ (7), ಅಸ್ಲಂ ಇನಾಮದಾರ (6) ಸೇರಿ ಎಲ್ಲರೂ ಅದ್ಭುತ ನಿರ್ವಹಣೆ ತೋರಿದರು. ಅಲ್ಲದೆ, ಪಂದ್ಯದ ಆರಂಭದಿಂದಲೂ ಮೇಲುಗೈ ಸಾಧಿಸಿದರು. ಹೀಗಾಗಿ ಬೆಂಗಳೂರು ವಿರುದ್ಧ ಭರ್ಜರಿ ಗೆಲುವು ಸಾಧಿಸಲು ನೆರವಾಯಿತು. ಅಂಕಪಟ್ಟಿಯಲ್ಲಿ 26 ಪಾಯಿಂಟ್ಸ್​ಗಳೊಂದಿಗೆ ಮೊದಲ ಸ್ಥಾನದಲ್ಲಿದೆ.

ಪಿಂಕ್ ಪ್ಯಾಂಥರ್ಸ್​ಗೆ 3ನೇ ಗೆಲುವು

ಯುಪಿ ಯೋಧಾಸ್ ಎದುರು ಅಮೋಘ ಆಟವಾಡಿದ ಹಾಲಿ ಚಾಂಪಿಯನ್ ಜೈಪುರ ಪಿಂಕ್ ಪ್ಯಾಂಥರ್ಸ್, ಲೀಗ್​​ನಲ್ಲಿ ಮೂರು ಪಂದ್ಯಗಳಲ್ಲಿ ಜಯದ ನಗೆ ಬೀರಿದೆ. ಅಲ್ಲದೆ, 20 ಅಂಕಗಳೊಂದಿಗೆ ಏಳನೇ ಸ್ಥಾನದಿಂದ 3ನೇ ಸ್ಥಾನಕ್ಕೆ ಜಿಗಿತ ಕಂಡಿದೆ. ಮತ್ತೊಂದೆಡೆ ಯೋಧಾಸ್ 15 ಪಾಯಿಂಟ್ಸ್​ ಗಳಿಸಿ 7ನೇ ಸ್ಥಾನದಲ್ಲಿದೆ. ಯೋಧಾಸ್ ತಂಡದಿಂದಲೂ ಅಂದುಕೊಂಡಂತೆ ಪ್ರದರ್ಶನ ಬರಲಿಲ್ಲ.