ಎಲ್ಲರೂ ಬ್ಯಾಟಿಂಗ್-ಬೌಲಿಂಗ್ ಅಭ್ಯಾಸ ಮಾಡ್ತಿದ್ರೆ, ಈತ ಟಾಸ್ ಹಾಕೋದನ್ನೇ ಪ್ರಾಕ್ಟೀಸ್ ಮಾಡ್ತಾರಂತೆ!
IPL 2024: 17ನೇ ಆವೃತ್ತಿಯ ಐಪಿಎಲ್ನಲ್ಲಿ ನಾಯಕನೊಬ್ಬ ಟಾಸ್ ಹಾಕೋದನ್ನೇ ಅಭ್ಯಾಸ ಮಾಡುತ್ತಿದ್ದಾರಂತೆ. ಈಗಾಗಲೇ ಅವರು ಆಡಿದ 10 ಪಂದ್ಯಗಳಲ್ಲಿ 9 ಬಾರಿ ಟಾಸ್ ಸೋತಿದ್ದಾರೆ.
ತನ್ನ ಸಾಮರ್ಥ್ಯ ಸಾಬೀತುಪಡಿಸಲು ಬ್ಯಾಟಿಂಗ್ ಮತ್ತು ಬೌಲಿಂಗ್ ಸತತವಾಗಿ ಅಭ್ಯಾಸ ನಡೆಸುತ್ತಾರೆ. ಅಲ್ಲದೆ, ಫೀಲ್ಡಿಂಗ್ ಪ್ರಾಕ್ಟೀಸ್ ಕೂಡ ಮಾಡುತ್ತಾರೆ. ಯಾವುದೇ ಪಂದ್ಯಕ್ಕೂ ಮುನ್ನ ಜರುಗುವ ಸಹಜ ಪ್ರಕ್ರಿಯೆ. ತಂಡಕ್ಕೆ ಆಯ್ಕೆಯಾದ ಎಲ್ಲರೂ ಸಹ ಈ ಅಭ್ಯಾಸ ನಡೆಸುತ್ತಾರೆ. ಆದರೆ, ಇಲ್ಲೊಬ್ಬ ಟಾಸ್ ಗೆಲ್ಲಲು ಸತತ ಅಭ್ಯಾಸ ನಡೆಸುತ್ತಿದ್ದಾನಂತೆ. ಆ ಆಟಗಾರ ಬೇರೆ ಯಾರೂ ಅಲ್ಲ, ಋತುರಾಜ್ ಗಾಯಕ್ವಾಡ್ (Ruturaj Gaikwad).
ಟ್ರೆಂಡಿಂಗ್ ಸುದ್ದಿ
ಹೌದು, ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಋತುರಾಜ್ ಗಾಯಕ್ವಾಡ್ ಅವರ ಪರಿಸ್ಥಿತಿ ಯಾರಿಗೂ ಹೇಳತೀರದ್ದಾಗಿದೆ. ಸಿಎಸ್ಕೆ ನಾಯಕತ್ವ ವಹಿಸಿಕೊಂಡಾಗಿನಿಂದ ಅವರು ಟಾಸ್ ಗೆಲ್ಲಲು ಹರಸಾಹಸಪಡುತ್ತಿದ್ದಾರೆ. ಆಡಿದ 10 ಪಂದ್ಯಗಳ ಪೈಕಿ 9ರಲ್ಲಿ ಟಾಸ್ ಸೋತಿದ್ದಾರೆ. ಕೇವಲ 1ರಲ್ಲಿ ಗೆದ್ದಿದ್ದಾರೆ. ಇದು ಗಾಯಕ್ವಾಡ್ಗೆ ಹೆಚ್ಚು ಬೇಸರ ತರಿಸಿದೆ. ಹಾಗಾಗಿ ಟಾಸ್ ಜಯಿಸಲು ಸತತವಾಗಿ ಅಭ್ಯಾಸ ನಡೆಸುತ್ತಿದ್ದಾರಂತೆ.
ಹೀಗಂತ ಋತುರಾಜ್ ಗಾಯಕ್ವಾಡ್ ಅವರೇ ಹೇಳಿದ್ದಾರೆ. ಮೇ 1ರ 30ರ ಬುಧವಾರ ನಡೆದ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ನಾಯಕ ಋತುರಾಜ್ ಗಾಯಕ್ವಾಡ್ ಮತ್ತೊಮ್ಮೆ ಟಾಸ್ ಸೋತರು. ಇದು ಈ ಋತುವಿನಲ್ಲಿ 10 ಪಂದ್ಯಗಳಲ್ಲಿ ಒಂಬತ್ತನೇ ಬಾರಿಯಾಗಿದೆ. ಎಂಎಸ್ ಧೋನಿ ಬದಲಿಗೆ ಐಪಿಎಲ್ ಆರಂಭಿಕ ಪಂದ್ಯಕ್ಕೂ ಮುನ್ನ ಗಾಯಕ್ವಾಡ್ ಅವರನ್ನು ಸಿಎಸ್ಕೆ ಹೊಸ ನಾಯಕನಾಗಿ ಘೋಷಿಸಲಾಯಿತು.
ಎಂಎ ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಪಂಜಾಬ್ ಕಿಂಗ್ಸ್ ನಾಯಕ ಸ್ಯಾಮ್ ಕರನ್ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಈ ಪಂದ್ಯದಲ್ಲಿ ಪಿಬಿಕೆಎಸ್ ಏಳು ವಿಕೆಟ್ಗಳಿಂದ ಜಯಗಳಿಸಿತು. 163 ರನ್ಗಳ ಗುರಿ ಬೆನ್ನತ್ತಿದ ಪಂಜಾಬ್, 17.5 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಜಯದ ನಗೆ ಬೀರಿತು. ಸಿಎಸ್ಕೆ 20 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 162 ರನ್ ಕಲೆ ಹಾಕಿತ್ತು.
ಟಾಸ್ ಅಭ್ಯಾಸ ಮಾಡುತ್ತೇನೆ ಎಂದ ಋತುರಾಜ್
ಪಂದ್ಯದ ನಂತರ ಮಾತನಾಡಿದ ಗಾಯಕ್ವಾಡ್, ಟಾಸ್ ವಿಚಾರದಲ್ಲಿ ತಮ್ಮ ಅದೃಷ್ಟದ ಬಗ್ಗೆ ವಿಷಾದಿಸಿದರು. ಟಾಸ್ ಹಾಕುವುದನ್ನು ಸತತ ಅಭ್ಯಾಸ ಮಾಡುತ್ತಿರುವುದಾಗಿ ಬಹಿರಂಗಪಡಿಸಿದ್ದಾರೆ. 'ಬಹುಶಃ 50-60 ರನ್ಗಳ ಕೊರತೆಯಿತ್ತು, ನಾವು ಬ್ಯಾಟಿಂಗ್ ಮಾಡಿದಾಗ ಪಿಚ್ ಉತ್ತಮವಾಗಿರಲಿಲ್ಲ. ನಾನು ಟಾಸ್ ಅಭ್ಯಾಸ ಮಾಡುತ್ತಿದ್ದೇನೆ. ಆದರೆ ನನ್ನ ಪರ ಫಲಿತಾಂಶ ಬರುತ್ತಿಲ್ಲ ಎಂದು ಹೇಳಿದ್ದಾರೆ.
ಹೀಗಾಗಿ ಏನು ಮಾಡಬೇಕೆಂದು ಖಚಿತವಿಲ್ಲ. ನಿಜ ಹೇಳಬೇಕೆಂದರೆ, ಟಾಸ್ಗೆ ಹೋದಾಗ ಒತ್ತಡಕ್ಕೆ ಒಳಗಾಗುತ್ತೇನೆ ಎಂದು ಅವರು ಹೇಳಿದ್ದಾರೆ. ಪರಿಸ್ಥಿತಿಗಳನ್ನು ಪರಿಗಣಿಸಿ ಕಳೆದ ಪಂದ್ಯದಲ್ಲಿ ನಾವು ದೊಡ್ಡ ಅಂತರದಿಂದ ಗೆದ್ದೆವು. ಕಳೆದ 2 ಪಂದ್ಯಗಳಲ್ಲಿ ಪರಿಸ್ಥಿತಿಗಳು ಮತ್ತು ಪಿಚ್ ಉತ್ತಮವಾಗಿತ್ತು ಎಂದು ನಾನು ಭಾವಿಸುತ್ತೇನೆ. ಇದು ನಮಗೆ ಕಠಿಣವಾಗಿ ಹೋರಾಡಲು ಮತ್ತು 200+ ತಲುಪಲು ಅನುವು ಮಾಡಿಕೊಟ್ಟಿತ್ತು ಎಂದಿದ್ದಾರೆ.
ಆದರೆ ಪಂಜಾಬ್ ಕಿಂಗ್ಸ್ ವಿರುದ್ಧ 180 ರನ್ ಗಳಿಸುವಷ್ಟು ಉತ್ತಮವಾಗಿರಲಿಲ್ಲ. ತಂಡಕ್ಕೆ ಗಾಯದ ಸಮಸ್ಯೆಯೂ ಕಾಡುತ್ತಿದೆ. ದೀಪಕ್ ಚಹರ್ ಮೊದಲ ಓವರ್ನಲ್ಲೇ ಹೊರನಡೆದರು. ಆದರೆ ಕೇವಲ ಇಬ್ಬರು ಬೌಲರ್ಗಳನ್ನಷ್ಟೇ ಹೊಂದಿದ್ದೆವು. ಉಳಿದ ನಾಲ್ಕು ಪಂದ್ಯಗಳಲ್ಲಿ ನಾವು ಗೆಲುವಿನ ಹಾದಿಗೆ ಮರಳಲು ಪ್ರಯತ್ನಿಸುತ್ತೇವೆ ಎಂದು ಗಾಯಕ್ವಾಡ್ ಅವರು ಹೇಳಿದ್ದಾರೆ.
ಕೊಹ್ಲಿಯನ್ನು ಹಿಂದಿಕ್ಕಿ ಆರೆಂಜ್ ಕ್ಯಾಪ್ ಪಡೆದ ಗಾಯಕ್ವಾಡ್
ಗಾಯಕ್ವಾಡ್ ಈ ಋತುವಿನಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದಾರೆ. ಪ್ರಸ್ತುತ 10 ಪಂದ್ಯಗಳಲ್ಲಿ 146.68 ಸ್ಟ್ರೈಕ್ ರೇಟ್ನಲ್ಲಿ 509 ರನ್ಗಳೊಂದಿಗೆ ಆರೆಂಜ್ ಕ್ಯಾಪ್ ಪಡೆದುಕೊಂಡಿದ್ದಾರೆ. ಒಂದು ಶತಕ ಮತ್ತು ನಾಲ್ಕು ಅರ್ಧಶತಕಗಳನ್ನು ಸಹ ದಾಖಲಿಸಿದ್ದಾರೆ. ಈ ಸೋಲಿನ ನಂತರ ಸಿಎಸ್ಕೆ ಐಪಿಎಲ್ 2024 ಪಾಯಿಂಟ್ಸ್ ಟೇಬಲ್ನಲ್ಲಿ 4ನೇ ಸ್ಥಾನದಲ್ಲಿದೆ. ಪಿಬಿಕೆಎಸ್ 7ನೇ ಸ್ಥಾನಕ್ಕೇರಿತು.
