ಆರ್ಸಿಬಿ ಫ್ಯಾನ್‌ ಆಗೋದು ಅಷ್ಟು ಸುಲಭ ಅಲ್ಲ ಗುರು; ಪೆನ್ನು-ಪೇಪರ್ ಹಿಡಿದು ಲೆಕ್ಕಾಚಾರ ಶುರು, ಅವರಿವರ ಸೋಲಿಗೆ ಪ್ರಾರ್ಥನೆ
IPL Playoff scenario: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪ್ಲೇಆಫ್ ಪ್ರವೇಶಿಸಲು ಹೇಗೆಲ್ಲಾ ಅವಕಾಶ ಇದೆ? ಯಾವ ತಂಡಗಳು ಸೋಲಬೇಕು, ಆರ್ಸಿಬಿ ಏನೆಲ್ಲಾ ಮಾಡಬೇಕು ಎಂದು ಅಭಿಮಾನಿಗಳು ಲೆಕ್ಕಾಚಾರ ಹಾಕುತ್ತಿದ್ದಾರೆ.
ಸೋಲಲಿ, ಗೆಲ್ಲಲಿ ಆರ್ಸಿಬಿ (RCB 2024) ತಂಡಕ್ಕೆ ಸಿಗುವಷ್ಟು ಬೆಂಬಲ ಐಪಿಎಲ್ನ ಬೇರೆ ಯಾವ ತಂಡಕ್ಕೂ ಸಿಗುವುದಿಲ್ಲ! ಹೌದು, ಅಭಿಮಾನಿಗಳಿಗೆ ಆರ್ಸಿಬಿ ಅಂದರೆ ಅಷ್ಟೊಂದು ಹುಚ್ಚು. 16 ವರ್ಷಗಳಿಂದ ಟ್ರೋಫಿ ಎಂಬುದು ಮರೀಚಿಕೆಯಾದರೂ ಅಭಿಮಾನಿಗಳ ಸಂಖ್ಯೆ ಏರುತ್ತಿದೆಯೇ ಹೊರತು ಕಡಿಮೆಯಾಗಿಲ್ಲ. ಎಷ್ಟೇ ಪಂದ್ಯ ಸೋತರೂ ನೋವು ನುಂಗಿಕೊಂಡೇ ತಂಡವನ್ನು ಸಮರ್ಥಿಸಿಕೊಳ್ಳುತ್ತಾರೆಯೇ ವಿನಃ ಎಂದೂ ಬಿಟ್ಟುಕೊಟ್ಟವರಲ್ಲ. ಯಾರೂ ಏನೇ ಹೇಳಿದರೂ ಅಭಿಮಾನಿಗಳು ಹೇಳುವುದೊಂದೇ ಈ ಸಲ ಕಪ್ ನಮ್ದೇ!
ಪ್ರಸಕ್ತ ಆವೃತ್ತಿಯ ಮೊದಲಾರ್ಧದಲ್ಲಿ 7 ಪಂದ್ಯಗಳಲ್ಲಿ 6 ಸೋಲು ಕಂಡಿದ್ದ ಆರ್ಸಿಬಿ, ದ್ವಿತಿಯಾರ್ಧದಲ್ಲಿ ಆಡಿರುವ 5 ಪಂದ್ಯಗಳಲ್ಲಿ 4ರಲ್ಲಿ ಗೆದ್ದಿದೆ. ಟೂರ್ನಿಯಲ್ಲಿ 12 ಪಂದ್ಯಗಳಲ್ಲಿ 5ರಲ್ಲಿ ಗೆದ್ದಿದ್ದು, 7ರಲ್ಲಿ ಸೋತಿದೆ. 10 ಅಂಕಗಳೊಂದಿಗೆ 7ನೇ ಸ್ಥಾನದಲ್ಲಿದೆ. ಇದರೊಂದಿಗೆ ಟೂರ್ನಿಯಿಂದ ಹೊರಬೀಳುವ ಮೊದಲ ತಂಡ ಎಂದು ಹೇಳುತ್ತಿದ್ದವರ ಭವಿಷ್ಯವನ್ನು ಆರ್ಸಿಬಿ ಸುಳ್ಳಾಗಿಸಿ, ಪ್ಲೇಆಫ್ ರೇಸ್ನಲ್ಲಿ ಇನ್ನೂ ಉಳಿದುಕೊಂಡಿದೆ. ಇದಕ್ಕಾಗಿ ಪವಾಡವೇ ನಡೆಯಬೇಕು. ಹೀಗಾಗಿ ಆರ್ಸಿಬಿ ಅಭಿಮಾನಿಗಳು ಪೆನ್ನು ಪೇಪರ್, ಕ್ಯಾಲ್ಕುಕೇಟರ್ ಹಿಡಿದು ಅವರಿವರ ಸೋಲಿಗೆ ಪ್ರಾರ್ಥಿಸುತ್ತಿದ್ದಾರೆ.
ಪಂಜಾಬ್ ಕಿಂಗ್ಸ್ ವಿರುದ್ಧ 60 ರನ್ಗಳಿಂದ ಗೆದ್ದ ಬೆನ್ನಲ್ಲೇ ಆರ್ಸಿಬಿ ಅಭಿಮಾನಿಗಳ ಕನಸು ಮತ್ತಷ್ಟು ಚಿಗುರೊಡೆದಿದೆ. ಇದರ ಬೆನ್ನಲ್ಲೇ ಅಭಿಮಾನಿಗಳು ತಮ್ಮ ವೈಯಕ್ತಿಕ ಕೆಲಸಗಳನ್ನೇ ಬದಿಗಿಟ್ಟು, ಪ್ಲೇಆಫ್ ಲೆಕ್ಕಾಚಾರ ಹಾಕುತ್ತಿದ್ದಾರೆ. ಯಾವ ತಂಡ ಸೋಲಬೇಕು, ಯಾರು ಗೆಲ್ಲಬೇಕು, ಆರ್ಸಿಬಿ ಏನು ಮಾಡಬೇಕು? ಹೀಗೆ ಹಲವು ಲೆಕ್ಕಾಚಾರ ಹಾಕಿಕೊಳ್ಳುತ್ತಾ ಕೂತಿದ್ದು, ತುಂಬಾ ತಲೆ ಕೆಡಿಸಿಕೊಳ್ಳುತ್ತಿದ್ದಾರೆ. ಬೇರೆ ಬೇರೆ ತಂಡಗಳ ಸೋಲಿಗೂ ಪ್ರಾರ್ಥನೆ ಕೂಡ ಮಾಡುತ್ತಿದ್ದಾರೆ.
ಸಿಎಸ್ಕೆ, ಗುಜರಾತ್, ಡೆಲ್ಲಿ, ಲಕ್ನೋ ಗೆದ್ದರೆ ಮತ್ತು ಸೋತರೆ ಆರ್ಸಿಬಿಗೆ ಯಾವ ರೀತಿಯ ಪರಿಣಾಮ ಬೀರುತ್ತದೆ ಎಂಬುದರ ಕುರಿತು ಲೆಕ್ಕ ಹಾಕುತ್ತಿದ್ದಾರೆ. ಆದರೆ ಬೇರೆ ಯಾವ ತಂಡದ ಅಭಿಮಾನಿಯೂ ಸಹ ಪ್ಲೇಆಫ್ ಲೆಕ್ಕಾಚಾರದ ಬಗ್ಗೆ ಯೋಚನೆಯೇ ಮಾಡಿಲ್ಲ. ಅವರು ತಲೆಯೇ ಕಡಿಸಿಕೊಳ್ಳುತ್ತಿಲ್ಲ. ಆದರೆ ಆರ್ಸಿಬಿ ಫ್ಯಾನ್ಸ್ ಅಭಿಮಾನಿಗಳು ತಮ್ಮ ಪರ್ಸನಲ್ ಕೆಲಸಗಳನ್ನೇ ಕೈಬಿಟ್ಟು ಅದಕ್ಕಾಗಿ ಸಮಯ ಹಾಳು ಮಾಡಿಕೊಳ್ಳುತ್ತಿದ್ದಾರೆ. ಬೆಳಿಗ್ಗೆ ಏಳುವಾಗ, ಮಲಗುವಾಗ ಆರ್ಸಿಬಿ ಪ್ಲೇಆಫ್ ಪ್ರವೇಶಿಸುವ ಕುರಿತೇ ಯೋಚನೆ ಮಾಡುತ್ತಿದ್ದಾರೆ.
ಯಾವ ತಂಡಕ್ಕೆ, ಎಷ್ಟು ಅವಕಾಶ ಇದೆ? (ಶೇಕಡವಾರು)
ಮುಂಬೈ ಇಂಡಿಯನ್ಸ್ ಮತ್ತು ಪಂಜಾಬ್ ಕಿಂಗ್ಸ್ ತಂಡಗಳು ಎಲಿಮಿನೇಟ್ ಆಗಿವೆ. ಯಾವ ತಂಡಕ್ಕೆ ಎಷ್ಟು ಶೇಕಡವಾರು ಪ್ಲೇಆಫ್ ಪ್ರವೇಶಿಸುವ ಸಾಧ್ಯತೆ ಇದೆ ಎಂಬುದರ ಕುರಿತು ಲೆಕ್ಕಹಾಕಿದ್ದಾರೆ. ಕೆಕೆಆರ್ ಮತ್ತು ಆರ್ಆರ್ ತಂಡಕ್ಕೆ ಶೇ 99, ಎಸ್ಆರ್ಹೆಚ್ ಶೇ 97, ಸಿಎಸ್ಕೆ ಶೇ 65, ಡೆಲ್ಲಿ ಶೇ 15, ಲಕ್ನೋ ಶೇ 14, ಆರ್ಸಿಬಿ ಶೇ 10ರಷ್ಟು ಪ್ಲೇಆಫ್ ಪ್ರವೇಶಿಸುವ ಅವಕಾಶ ಇದೆ. ಹಾಗಾಗಿ ಈ ಶೇಕಡವಾರು ಏರಿಸಲು ಆರ್ಸಿಬಿ ಫ್ಯಾನ್ಸ್ ಸಿಎಸ್ಕೆ, ಡೆಲ್ಲಿ, ಲಕ್ನೋ ತಂಡಗಳು ಸೋಲಬೇಕೆಂದು ಪ್ರಾರ್ಥಿಸುತ್ತಿದ್ದಾರೆ. ಆರ್ಸಿಬಿ ಪ್ಲೇಆಫ್ ಪ್ರವೇಶಿಸಲು ಯಾವೆಲ್ಲಾ ಸಾಧ್ಯತೆ ಇದೆಯೋ ಅದೆಲ್ಲವನ್ನೂ ಹುಡುಕಾಟ ನಡೆಸುತ್ತಿದ್ದು, ಇತರ ತಂಡಗಳ ಸೋಲಿಗೆ ದೇವರ ಮೊರೆ ಹೋಗಿದ್ದಾರೆ.
ಆರ್ಸಿಬಿ 3ನೇ ಸ್ಥಾನ ಹೇಗೆ ಪಡೆಯಬಹುದು?
- ಆರ್ಸಿಬಿ ಕೇವಲ ನಾಲ್ಕನೇ ಸ್ಥಾನವಲ್ಲ, 3ನೇ ಸ್ಥಾನವನ್ನೂ ಪಡೆಯಲು ಅವಕಾಶ ಇದೆ. ಅದಕ್ಕೆ ಇಲ್ಲಿದೆ ನೋಡಿ ಅವಕಾಶ.
- ಆರ್ಸಿಬಿ ತನ್ನ ಕೊನೆಯ 2 ಪಂದ್ಯಗಳಲ್ಲಿ ಗೆಲ್ಲಲೇಬೇಕು.
- ಸನ್ರೈಸರ್ಸ್ ಹೈದರಾಬಾದ್ (ಜಿಟಿ, ಡಿಸಿ ವಿರುದ್ಧ) ಎಲ್ಲಾ ಪಂದ್ಯಗಳಲ್ಲಿ ಸೋಲಬೇಕು.
- ಅದೇ ರೀತಿ ಚೆನ್ನೈ ತನ್ನ 3 (ಜಿಟಿ, ಆರ್ಆರ್, ಆರ್ಸಿಬಿ) ಪಂದ್ಯಗಳಲ್ಲೂ ಪರಾಭವಗೊಳ್ಳಬೇಕು.
- ಮತ್ತೊಂದೆಡೆ ಲಕ್ನೋ, ಡೆಲ್ಲಿ ವಿರುದ್ಧ ಗೆಲ್ಲಬೇಕು, ಆದರೆ ಮುಂಬೈ ವಿರುದ್ಧ ಸೋಲಬೇಕು.
- ಡೆಲ್ಲಿ ತಂಡವು ಲಕ್ನೋ ಮತ್ತು ಬೆಂಗಳೂರು ವಿರುದ್ಧ ಸೋಲಬೇಕು.
- ಹೀಗಾದಾಗ ಆರ್ಸಿಬಿ 14 ಅಂಕಗಳೊಂದಿಗೆ 3ನೇ ಸ್ಥಾನ ಮತ್ತು ಲಕ್ನೋ 14 ಅಂಕಗಳೊಂದಿಗೆ ನಾಲ್ಕನೇ ಸ್ಥಾನ ಪಡೆಯಲಿದೆ.
- ಲಕ್ನೋ ವಿರುದ್ಧ ಡೆಲ್ಲಿ ಗೆದ್ದರೆ, ಆರ್ಸಿಬಿ ವಿರುದ್ಧ ಸೋಲಬೇಕು. ಆಗ ಮುಂಬೈ ವಿರುದ್ಧ ಲಕ್ನೋ ಗೆದ್ದರೂ ಆರ್ಸಿಬಿ ಮೂರನೇ ಸ್ಥಾನದಲ್ಲೇ ಉಳಿಯಬಹುದು. ಅದಕ್ಕಾಗಿ ಲಕ್ನೋ-ಡೆಲ್ಲಿಗಿಂತ ನೆಟ್ ರನ್ ರೇಟ್ ಉತ್ತಮವಾಗಿ ಕಾಯ್ದುಕೊಳ್ಳಬೇಕು.
ಆರ್ಸಿಬಿ 4ನೇ ಸ್ಥಾನ ಪಡೆಯಲು ಹೇಗೆ ಸಾಧ್ಯ?
- ಆರ್ಸಿಬಿ ತನ್ನ ಪ್ಲೇಆಫ್ ಆಸೆಯನ್ನು ಜೀವಂತವಾಗಿಟ್ಟುಕೊಳ್ಳಲು ತನ್ನ ಎರಡೂ ಪಂದ್ಯಗಳನ್ನು ಗೆಲ್ಲಬೇಕು.
- ಭಯ ತಂಡಗಳಿಗೂ 18 ಅಂಕ ಸಂಪಾದಿಸಲು ಅವಕಾಶವಿರುವ ಕಾರಣ ಎಸ್ಆರ್ಹೆಚ್ ಮತ್ತು ಸಿಎಸ್ಕೆ ತಂಡಗಳು ತಮ್ಮ ಎಲ್ಲಾ ಪಂದ್ಯಗಳನ್ನು ಸೋಲಬೇಕು. ಅಲ್ಲದೆ ಎರಡೂ ತಂಡಗಳು ಕನಿಷ್ಠ 16 ಅಂಕ ಗಳಿಸಿದರೆ ಆರ್ಸಿಬಿಗೆ ಕನಸು ಭಗ್ನವಾಗಲಿದೆ.
- ಆದಾಗ್ಯೂ, ಈ ಎರಡಲ್ಲಿ ಒಂದು ತಂಡ 16 ಅಥವಾ 18 ಅಂಕ ಗಳಿಸಿದರೆ, ಇನ್ನೊಂದು ತಂಡ 14 ಅಂಕಕ್ಕೆ ಮುಗಿಸಿದರೆ ಆರ್ಸಿಬಿಗೆ ಮತ್ತೆ ಅವಕಾಶ ಇರಲಿದೆ. ಮತ್ತೊಂದೆಡೆ ಡೆಲ್ಲಿ vs ಲಕ್ನೋ ನಡುವಿನ ಪಂದ್ಯದಲ್ಲಿ ಯಾರೇ ಗೆದ್ದರೂ 14 ಅಂಕ ಆಗಲಿದೆ. ಇಂತಹ ಸನ್ನಿವೇಶದಲ್ಲಿ ಆರ್ಸಿಬಿ 14 ಅಂಕಗಳಲ್ಲಿ 3 ರೀತಿಯಲ್ಲಿ ಟೈ ಆಗಲಿದೆ. ಆಗ ನೆಟ್ ರನ್ ರೇಟ್ ಇಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ.
- ಎಸ್ಆರ್ಹೆಚ್ ಎಲ್ಲಾ ಪಂದ್ಯ ಗೆಲ್ಲಬೇಕು, ಸಿಎಸ್ಕೆ, ಡೆಲ್ಲಿ ಎಲ್ಲಾ ಸೋಲಬೇಕು. ಆಗ ಎಲ್ಎಸ್ಜಿ ಡೆಲ್ಲಿ ವಿರುದ್ಧ ಗೆದ್ದು ಮುಂಬೈ ವಿರುದ್ಧ ಸೋಲಬೇಕು. ಆಗ ಆರ್ಸಿಬಿ ಮತ್ತು ಲಕ್ನೋ ತಲಾ 14 ಅಂಕ ಪಡೆಯಲಿವೆ. ನೆಟ್ರೇಟ್ ಕಾಯ್ದುಕೊಂಡ ತಂಡ 4ನೇ ಸ್ಥಾನ ಪಡೆಯಲಿದೆ. ಪ್ರಸ್ತುತ ಆರ್ಸಿಬಿ ಧನಾತ್ಮಕ ನೆಟ್ರನ್ ರೇಟ್ ಹೊಂದಿದೆ.
- ಸಿಎಸ್ಕೆ/ಎಸ್ಆರ್ಹೆಚ್ ಮತ್ತು ಎಲ್ಎಸ್ಜಿ/ಡಿಸಿಗಿಂತ ಉತ್ತಮವಾದ ನೆಟ್ರನ್ ರೇಟ್ ಹೊಂದಬೇಕು. ಲಕ್ನೋ ಮೈನಸ್ ನೆಟ್ ರನ್ರೇಟ್ ಹೊಂದಿರುವುದರಿಂದ ಮೇ 14 ರಂದು ನಿರ್ಣಾಯಕ ಪಂದ್ಯದಲ್ಲಿ ಡಿಸಿ ತಂಡವನ್ನು ಲಕ್ನೋ ಸೋಲಿಸಬೇಕು.
