ಕನ್ನಡ ಸುದ್ದಿ  /  ಕ್ರಿಕೆಟ್  /  ಮಿಚೆಲ್ ಸ್ಟಾರ್ಕ್ ಮೇಲೆ ಕೆಕೆಆರ್​ 24.75 ಕೋಟಿ ಸುರಿದಾಗ ಕುಹಕ ನಗೆಬೀರಿದ್ದ ಎಂಐ ಓನರ್ಸ್; ಮಂಗಳಾರತಿ ಮಾಡಿದ ಫ್ಯಾನ್ಸ್

ಮಿಚೆಲ್ ಸ್ಟಾರ್ಕ್ ಮೇಲೆ ಕೆಕೆಆರ್​ 24.75 ಕೋಟಿ ಸುರಿದಾಗ ಕುಹಕ ನಗೆಬೀರಿದ್ದ ಎಂಐ ಓನರ್ಸ್; ಮಂಗಳಾರತಿ ಮಾಡಿದ ಫ್ಯಾನ್ಸ್

Mitchell Starc: ಐಪಿಎಲ್​-2024 ಫೈನಲ್​ನಲ್ಲಿ ಪಂದ್ಯಶ್ರೇಷ್ಠ ಪ್ರದರ್ಶನ ನೀಡಿದ ಮಿಚೆಲ್ ಸ್ಟಾರ್ಕ್​ ಮೇಲೆ ಮಿನಿ ಹರಾಜಿನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ 24.75 ಕೋಟಿ ಸುರಿದಾಗ ಮುಂಬೈ ಇಂಡಿಯನ್ಸ್ ಮಾಲೀಕರು ಕುಹಕ ನಗೆ ಬೀರಿದ್ದರು.

ಮಿಚೆಲ್ ಸ್ಟಾರ್ಕ್ ಮೇಲೆ ಕೆಕೆಆರ್​ 24.75 ಕೋಟಿ ಸುರಿದಾಗ ಕುಹಕ ನಗೆಬೀರಿದ್ದ ಎಂಐ ಓನರ್ಸ್; ಮಂಗಳಾರತಿ ಮಾಡಿದ ಫ್ಯಾನ್ಸ್
ಮಿಚೆಲ್ ಸ್ಟಾರ್ಕ್ ಮೇಲೆ ಕೆಕೆಆರ್​ 24.75 ಕೋಟಿ ಸುರಿದಾಗ ಕುಹಕ ನಗೆಬೀರಿದ್ದ ಎಂಐ ಓನರ್ಸ್; ಮಂಗಳಾರತಿ ಮಾಡಿದ ಫ್ಯಾನ್ಸ್

Mitchell Starc: ಚೆನ್ನೈನ ಎಂಎ ಚಿದಂಬರಂ ಕ್ರಿಕೆಟ್ ಮೈದಾನದಲ್ಲಿ ನಡೆದ 2024ರ ಮಿಲಿಯನ್ ಡಾಲರ್ ಟೂರ್ನಿ ಐಪಿಎಲ್​ ಫೈನಲ್​ನಲ್ಲಿ ಸನ್​ರೈಸರ್ಸ್ ಹೈದರಾಬಾದ್ ತಂಡವನ್ನು 8 ವಿಕೆಟ್​ಗಳಿಂದ ಪರಾಭವಗೊಳಿಸಿದ ಕೋಲ್ಕತ್ತಾ ನೈಟ್ ರೈಡರ್ಸ್ 3ನೇ ಚಾಂಪಿಯನ್ ಆಯಿತು. ಮಿಚೆಲ್​ ಸ್ಟಾರ್ಕ್​ ಅವರ ಖಡಕ್ ಬೌಲಿಂಗ್ ದಾಳಿಯ ನೆರವಿನಿಂದ ಎಸ್​ಆರ್​​ಹೆಚ್​ ಶರಣಾಯಿತು. ಮೂರು ಓವರ್​​ಗಳಲ್ಲಿ 14 ರನ್ ಬಿಟ್ಟುಕೊಟ್ಟು 2 ವಿಕೆಟ್ ಉರುಳಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಟ್ರೆಂಡಿಂಗ್​ ಸುದ್ದಿ

ಫೈನಲ್ ಮಾತ್ರವಲ್ಲ, ಕ್ವಾಲಿಫೈಯರ್-1ರ ಪಂದ್ಯದಲ್ಲಿ ಪಂದ್ಯಶ್ರೇಷ್ಠ ಪ್ರದರ್ಶನ ನೀಡಿದ ಮಿಚೆಲ್ ಸ್ಟಾರ್ಕ್​ ಅವರ ವಿಚಾರವಾಗಿ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ ಮಾಲೀಕರು ನೀತಾ ಅಂಬಾನಿ ಮತ್ತು ಮಗ ಆಕಾಶ್ ಅಂಬಾನಿ ಕುಹಕ ನಗೆ ಬೀರಿದ್ದರು. 2023ರ ಡಿಸೆಂಬರ್​ 19 ರಂದು ನಡೆದ ಐಪಿಎಲ್-2024 ಮಿನಿ ಹರಾಜಿನಲ್ಲಿ ಕೆಕೆಆರ್ ತಂಡವು ಆಸ್ಟ್ರೇಲಿಯಾ ಯಾರ್ಕರ್ ಸ್ಪೆಷಲಿಸ್ಟ್ ಮಿಚೆಲ್ ಸ್ಟಾರ್ಕ್ ಮೇಲೆ 24.75 ಕೋಟಿ ಸುರಿದಾಗ ಎಂಐ ಓನರ್ಸ್​ ವ್ಯಂಗ್ಯವಾಗಿ ನಕ್ಕಿದ್ದರು.

ಆದರೆ ಅದೇ ದುಬಾರಿ ಆಟಗಾರ ಇಂದು ಕೋಲ್ಕತ್ತಾ ತಂಡವನ್ನು ಚಾಂಪಿಯನ್ ಮಾಡುವಲ್ಲಿ ಮೇಜರ್​ ಪಾತ್ರವನ್ನು ನಿಭಾಯಿಸಿದ್ದಾರೆ. ಐಪಿಎಲ್​ ಇತಿಹಾಸದಲ್ಲಿ ದುಬಾರಿ ಆಟಗಾರ ಎಂಬ ದಾಖಲೆಗೆ ಒಳಗಾದ ಮಿಚೆಲ್ ಸ್ಟಾರ್ಕ್​, ಐಪಿಎಲ್ ಮೊದಲಾರ್ಧದಲ್ಲಿ ಹೆಚ್ಚು ರನ್ ಬಿಟ್ಟುಕೊಟ್ಟು ಕಳಪೆ ಬೌಲರ್​ ಎಂಬ ಕುಖ್ಯಾತಿಗೆ ಒಳಗಾಗಿದ್ದರು. ಆದರೆ ದ್ವಿತಿಯಾರ್ಧದ ಐಪಿಎಲ್​ನಲ್ಲಿ ಬಲಿಷ್ಠವಾಗಿ ಪುನರಾಗಮನ ಮಾಡಿದ ಸ್ಟಾರ್ಕ್​ ವಿಕೆಟ್ ಬೇಟೆಯಾಡಿದರು.

ಬಿಗ್​ ಮ್ಯಾಚ್​ ಪ್ಲೇಯರ್ ಸ್ಟಾರ್ಕ್​

ಮಿಚೆಲ್ ಸ್ಟಾರ್ಕ್​ ದೊಡ್ಡ ಪಂದ್ಯಗಳ ಪ್ಲೇಯರ್​ ಆಗಿದ್ದಾರೆ. ಲೀಗ್​ ಪಂದ್ಯಗಳಲ್ಲಿ ಅತ್ಯುತ್ತಮ ನಿರ್ವಹಣೆ ತೋರದಿದ್ದರೂ ಫೈನಲ್, ಸೆಮಿ ಫೈನಲ್ ಪಂದ್ಯಗಳಲ್ಲಿ ಮ್ಯಾಚ್​ ವಿನ್ನರ್​ ಮತ್ತು ಗೇಮ್​ ಚೇಂಜರ್ ಆಗಿದ್ದಾರೆ. 2023ರ ಏಕದಿನ ವಿಶ್ವಕಪ್ ಟೂರ್ನಿಯ ಲೀಗ್​ ಪಂದ್ಯಗಳಲ್ಲಿ 8ರಲ್ಲಿ 10 ವಿಕೆಟ್ ಪಡೆದಿದ್ದ ಸ್ಟಾರ್ಕ್​, 2 ನಾಕೌಟ್​ ಪಂದ್ಯಗಳಲ್ಲಿ 6 ವಿಕೆಟ್ ಉರುಳಿಸಿದರು. ಐಪಿಎಲ್ 2024ರ ಲೀಗ್​ ಪಂದ್ಯಗಳಲ್ಲಿ 12ಕ್ಕೆ 12 ವಿಕೆಟ್ ಪಡೆದಿದ್ದ ವೇಗಿ, 5 ಪ್ಲೇಆಫ್ ಪಂದ್ಯಗಳಲ್ಲಿ 5 ವಿಕೆಟ್ ಉರುಳಿಸಿ ಮಿಂಚಿದರು.

ಕುಹಕ ನಗೆ ಬೀರಿದ್ದ ಅಂಬಾನಿ ತಂಡಕ್ಕೆ 10ನೇ ಸ್ಥಾನ

ಮುಂಬೈ ಇಂಡಿಯನ್ಸ್ ಮಾಲೀಕರು ವ್ಯಂಗ್ಯದ ನಗೆ ಬೀರಿದ್ದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ಕ್ರಿಕೆಟ್ ಪ್ರಿಯರು ಎಂಐ ಮಾಲೀಕರ ವಿರುದ್ಧ ಕಿಡಿಕಾರಿದ್ದಾರೆ. ಕೆಕೆಆರ್​ 24.75 ಕೋಟಿ ಕೊಟ್ಟು ಸ್ಟಾರ್ಕ್​ ಖರೀದಿಸಿದ ಅವಧಿಯಲ್ಲಿ ನಕ್ಕಿದ್ದ ನೀತಾ ಅಂಬಾನಿ ಮಾಲೀಕತ್ವದ ತಂಡವು 2024ರ ಐಪಿಎಲ್​ನಲ್ಲಿ ಲೀಗ್​​ನಲ್ಲಿ ಹೀನಾಯ ಪ್ರದರ್ಶನದೊಂದಿಗೆ 10ನೇ ಸ್ಥಾನ ಪಡೆದಿದೆ. ಹಾರ್ದಿಕ್ ನಾಯಕತ್ವದಲ್ಲಿ ಆಡಿದ 14 ಪಂದ್ಯಗಳಲ್ಲಿ 4 ಗೆಲುವು, 10 ಸೋಲಿನೊಂದಿಗೆ 10ನೇ ಸ್ಥಾನ ಪಡೆದಿತ್ತು.

ಮಿಚೆಲ್ ಸ್ಟಾರ್ಕ್​ ದಾಖಲೆ

ಮೊದಲ ಕ್ವಾಲಿಫೈಯರ್ ಮತ್ತು ಫೈನಲ್​​ನಲ್ಲಿ ಮ್ಯಾನ್ ಆಫ್ ದ ಮ್ಯಾಚ್ ಪ್ರಶಸ್ತಿಯನ್ನು ಗೆದ್ದುಕೊಂಡಿರುವ ಮಿಚೆಲ್ ಸ್ಟಾರ್ಕ್​ ನೂತನ ದಾಖಲೆಯೊಂದನ್ನು ನಿರ್ಮಿಸಿದ್ದಾರೆ. ಐಪಿಎಲ್ ಇತಿಹಾಸದಲ್ಲಿ ಪ್ಲೇಯರ್ ಆಫ್ ದಿ ಮ್ಯಾಚ್ (POTM) ಪ್ರಶಸ್ತಿಯನ್ನು ಒಂದೇ ಋತುವಿನಲ್ಲಿ ಎರಡು ಬಾರಿ ಗೆದ್ದುಕೊಂಡ ಮೊದಲ ಆಟಗಾರನಾಗುವ ಮೂಲಕ ಇತಿಹಾಸ ಪುಸ್ತಕಗಳಲ್ಲಿ ತನ್ನ ಹೆಸರನ್ನು ಬರೆದಿದ್ದಾರೆ. ಮೊದಲ ಕ್ವಾಲಿಫೈಯರ್ ಪಂದ್ಯದಲ್ಲಿ ಸ್ಟಾರ್ಕ್​ ಮೂರು ವಿಕೆಟ್ ಪಡೆದಿದ್ದರು.

 

 

(ಕನ್ನಡದಲ್ಲಿ ಕ್ರಿಕೆಟ್, ಎಚ್‌ಟಿ ಕನ್ನಡ ಬೆಸ್ಟ್‌. ಐಪಿಎಲ್, ಟಿ20 ವರ್ಲ್ಡ್‌ಕಪ್ ಸೇರಿದಂತೆ ಕ್ರಿಕೆಟ್ ಲೋಕದ ಸಮಗ್ರ ಮಾಹಿತಿ, ತಾಜಾ ವಿದ್ಯಮಾನ, ರನ್-ವಿಕೆಟ್, ಪ್ಲೇಆಫ್, ಟೀಮ್ ಸ್ಟಾಟ್ ವಿಶ್ಲೇಷಣೆಗಳಿಗಾಗಿ kannada.hindustantimes.com/cricket ಕ್ಕೆ ಭೇಟಿ ನೀಡಿ.)

 

ಟಿ20 ವರ್ಲ್ಡ್‌ಕಪ್ 2024

ಕ್ರಿಕೆಟ್‌ಗೆ ಸಂಬಂಧಿಸಿದ ಎಲ್ಲ ಸುದ್ದಿ, T20 ವಿಶ್ವಕಪ್, T20 ವಿಶ್ವಕಪ್ ವೇಳಾಪಟ್ಟಿ, T20 ವಿಶ್ವಕಪ್ ಅತ್ಯಧಿಕ ರನ್‌ಗಳು, T20 ವಿಶ್ವಕಪ್ ಪಾಯಿಂಟ್ಸ್ ಟೇಬಲ್, T20 ವಿಶ್ವಕಪ್ ಲೈವ್ ಸ್ಕೋರ್, T20 ವಿಶ್ವಕಪ್ ಅಂಕಿಅಂಶಗಳು.. ಕ್ರಿಕೆಟ್‌ಗೆ ಸಂಬಂಧಿಸಿದ ಸಮಗ್ರ ಮಾಹಿತಿಗಾಗಿ HT ಕನ್ನಡ ವೆಬ್‌ಸೈಟ್ ನೋಡಿ