ಲಕ್ಷ್ಮೀ ನಿವಾಸ ಧಾರಾವಾಹಿ; ತಾತನ ಚಿತೆ ಮುಂದೆ ಜಯಂತನ ಡ್ಯಾನ್ಸ್; ದೀಪಕ್‌ ಸುಬ್ರಹ್ಮಣ್ಯ ಆಕ್ಟಿಂಗ್‌ ನೆಕ್ಸ್ಟ್‌ ಲೆವೆಲ್‌ ಎಂದ ಜನರು
ಲಕ್ಷ್ಮೀ ನಿವಾಸ ಧಾರಾವಾಹಿ ಕುತೂಹಲ ಘಟ್ಟ ತಲುಪಿದೆ. ಗಂಡನ ಅಸಲಿ ಮುಖ ತಿಳಿದು ಜಾಹ್ನವಿ ಗಾಬರಿಯಾಗುತ್ತಾಳೆ. ಆಶ್ರಮದಲ್ಲಿ ವಿಚಾರಿಸಿದಾಗ ಅವನ ಹಿನ್ನೆಲೆ ತಿಳಿಯುತ್ತದೆ. ತಾತನ ಚಿತೆ ಮುಂದೆ ಮುಖಕ್ಕೆ ಬೂದಿ ಬಳಿದುಕೊಂಡು ಜಯಂತ್‌ ಡ್ಯಾನ್ಸ್ ಮಾಡುವ ದೃಶ್ಯವನ್ನು ನೆಟಿಜನ್ಸ್‌ ಇಷ್ಟಪಟ್ಟಿದ್ದಾರೆ. ದೀಪಕ್‌ ಸುಬ್ರಹ್ಮಣ್ಯ ಆಕ್ಟಿಂಗ್‌ ಸೂಪರ್‌ ಎಂದಿದ್ದಾರೆ.
ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಲಕ್ಷ್ಮೀ ನಿವಾಸ ಧಾರಾವಾಹಿ 387 ನೇ ಎಪಿಸೋಡ್‌ ಪೂರೈಸಿದೆ. ಧಾರಾವಾಹಿಯಲ್ಲಿ ಮೂರು ಪ್ರತ್ಯೇಕ ಕುಟುಂಬಗಳ ಕಥೆಯನ್ನು ತೋರಿಸಲಾಗುತ್ತಿದೆ. ಲಕ್ಷ್ಮೀ-ಶ್ರೀನಿವಾಸ್‌, ಜಾಹ್ನವಿ-ಜಯಂತ್‌, ಸಿದ್ದೇಗೌಡ-ಭಾವನಾ ಸಂಸಾರದಲ್ಲಿ ಹೊಸ ಟ್ವಿಸ್ಟ್ ಸಿಕ್ಕಿದೆ. ಒಂದೊಂದು ಎಪಿಸೋಡ್‌ ಕೂಡಾ ಬಹಳ ಕುತೂಹಲ ಕೆರಳಿಸುತ್ತಿದೆ.
ಮನೆ ಬಿಟ್ಟು ಹೊರಡುವ ಜಾಹ್ನವಿ
ಬುಧವಾರದ ಎಪಿಸೋಡ್‌ನಲ್ಲಿ ಜಯಂತನ ವಿಚಿತ್ರ ಡ್ಯಾನ್ಸ್ ನೋಡುಗರಿಗೆ ಖುಷಿ ನೀಡಿದೆ. ಅಲ್ಲೊಬ್ಬರು ಇಲ್ಲೊಬ್ಬರು ಧಾರಾವಾಹಿ ಕಥೆ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದರೆ ಬಹುತೇಕ ಎಲ್ಲರೂ ಜಯಂತನ ಆಕ್ಟಿಂಗ್‌ ಹೊಗಳಿದ್ದಾರೆ. ಗಂಡನ ವಿಚಿತ್ರ ವರ್ತನೆಯಿಂದ ಜಾಹ್ನವಿ ಬೇಸತ್ತಿದ್ಧಾಳೆ. ಜಯಂತ್‌ ಆಫೀಸಿಗೆ ಹೋದ ನಂತರ ಜಾಹ್ನವಿ ಮನೆಯಲ್ಲಿ ಒಬ್ಬಳೇ ಇರಬೇಕು, ಯಾರ ಜೊತೆ ಮಾತನಾಡುವಂತಿಲ್ಲ, ಫೋನಿನಲ್ಲಿ ಮಾತನಾಡೋಣ ಎಂದರೆ ಜಯಂತ್‌ ಜಾಮರ್‌ ಆಫ್‌ ಮಾಡಿ ಯಾರೊಂದಿಗೆ ಮಾತನಾಡದಂತೆ ಮಾಡುತ್ತಾನೆ. ಲ್ಯಾಂಡ್‌ಲೈನ್‌ ಕನೆಕ್ಷನ್‌ ಕೂಡಾ ತೆಗೆಯುತ್ತಾನೆ. ಒಟ್ಟಿನಲ್ಲಿ ಜಯಂತನ ವರ್ತನೆ ಜಾಹ್ನವಿಗೆ ವಿಚಿತ್ರ ಎನಿಸುತ್ತಿದೆ. ಒಮ್ಮೆ ತರಕಾರಿ ತರಲು ಹೋದಾಗ ಹಳೆಯ ವಾಚ್‌ಮ್ಯಾನ್‌ ಜಾಹ್ನವಿಯನ್ನು ಭೇಟಿ ಮಾಡಿ ನಿನ್ನ ಗಂಡನಿಂದ ನಿನಗೆ ತೊಂದರೆ ಇದೆ ಎನ್ನುತ್ತಾನೆ.
ಜಯಂತನ ಬಗ್ಗೆ ಆಶ್ರಮದ ಫಾದರ್‌ ಬಳಿ ತಿಳಿದುಕೊಳ್ಳುವ ಜಾಹ್ನವಿ
ಜಾಹ್ನವಿ ಗಂಡನ ವರ್ತನೆಗೆ ಹೆದರಿ ಅವನು ಆಫೀಸಿನಿಂದ ಬರುವಷ್ಟರಲ್ಲಿ ಮನೆಬಿಟ್ಟು ಬರುತ್ತಾಳೆ. ಆದರೆ ಅವಳಿಗೆ ಎಲ್ಲಿ ಹೋಗುವುದು ತಿಳಿಯುವುದಿಲ್ಲ. ಮನೆಯಿಂದ ತಪ್ಪಿಸಿಕೊಂಡು ಬರುವ ಆತುರದಲ್ಲಿ ದುಡ್ಡು ಕೂಡಾ ತಂದಿರುವುದಿಲ್ಲ. ಜಯಂತ್‌ ಹುಟ್ಟಿ ಬೆಳೆದ ಆಶ್ರಮಕ್ಕೆ ಹೋಗಿ ವಿಚಾರಿಸಿದರೆ ಏನಾದರೂ ತಿಳಿಯಬಹುದು ಎಂದುಕೊಂಡು ಅಲ್ಲಿಗೆ ಹೋಗುತ್ತಾಳೆ. ಜಯಂತ್‌ ಹೆಸರು ಕೇಳುತ್ತಿದ್ದಂತೆ ಫಾದರ್‌ ಬೆಚ್ಚಿ ಬೀಳುತ್ತಾರೆ. ಅವನು ಬಾಲ್ಯದಲ್ಲೇ ತಂದೆ ತಾಯಿಯನ್ನು ಕಳೆದುಕೊಂಡವನು, ಅದೇ ನೋವಿನಲ್ಲಿದ್ದ ಜಯಂತ್‌ನನ್ನು ಅವರ ತಾತ ಸಾಕುತ್ತಿದ್ದರು. ಅದರೆ ಜಯಂತ್‌ ತಾತನಿಗೆ ಇದ್ದ ಮಾನಸಿಕ ಸಮಸ್ಯೆ ಅವನಿಗೂ ಬಂದಿರುತ್ತದೆ. ಸಣ್ಣ ಪುಟ್ಟ ವಿಚಾರಗಳಿಗೂ ಜಯಂತ್‌, ತಾತನಿಂದ ಒದೆ ತಿನ್ನುತ್ತಾನೆ.
ತಾತನ ಚಿತೆ ಮುಂದೆ ಜಯಂತನ ವಿಚಿತ್ರ ಡ್ಯಾನ್ಸ್
ಒಂದು ದಿನ ತಾತ ಕೂಡಾ ಅವನಿಂದ ದೂರಾಗುತ್ತಾರೆ. ತಾತನ ಅಂತ್ಯ ಸಂಸ್ಕಾರ ಮುಗಿದ ನಂತರ ಎಲ್ಲರೂ ಅಲ್ಲಿಂದ ಹೋಗುತ್ತಾರೆ. ಆದರೆ ಜಯಂತ್‌ ಮಾತ್ರ ಚಿತೆ ಮುಂದೆಯೇ ನಿಲ್ಲುತ್ತಾನೆ. ಅವನನ್ನು ಕರೆ ತರಲು ಹೋದಾಗ, ಅಲ್ಲಿನ ದೃಶ್ಯ ಕಂಡು ಅವರು ಗಾಬರಿಯಾಗುತ್ತಾರೆ. ಜಯಂತ್‌, ತಾತನ ಚಿತೆಯ ಬೂದಿಯನ್ನು ಮುಖಕ್ಕೆ ಬಳಿದುಕೊಂಡು ವಿಚಿತ್ರವಾಗಿ ಡ್ಯಾನ್ಸ್ ಮಾಡಲು ಆರಂಭಿಸುತ್ತಾನೆ. ಈ ಎಲ್ಲಾ ಫ್ಲಾಷ್‌ಬ್ಯಾಕನ್ನು ಫಾದರ್‌, ಜಾಹ್ನವಿಗೆ ಹೇಳುತ್ತಾರೆ. ಅಲ್ಲಿಂದ ಜಾಹ್ನವಿ ಎಲ್ಲಿ ಹೋಗಬೇಕೆಂದು ತಿಳಿಯದೆ ಹತ್ತಿರದಲ್ಲೇ ಇದ್ದ ಒಬ್ಬರ ಮನೆ ಬಂದು ಸಹಾಯ ಕೇಳುತ್ತಾಳೆ.
ದೀಪಕ್‌ ಸುಬ್ರಹ್ಮಣ್ಯ ನಟನೆಗೆ ಮೆಚ್ಚುಗೆ
ಬುಧವಾರದ ಎಪಿಸೋಡ್‌ನಲ್ಲಿ ಜಯಂತ್‌ ಪಾತ್ರಧಾರಿ ದೀಪಕ್‌ ಸುಬ್ರಹ್ಮಣ್ಯ ನಟನೆಗೆ ವೀಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ವಾಹಿನಿಯು ಅಧಿಕೃತ ಸೋಷಿಯಲ್‌ ಮೀಡಿಯಾ ಖಾತೆಯಲ್ಲಿ ಹಂಚಿಕೊಂಡಿರುವ ವಿಡಿಯೋಗೆ ಕಾಮೆಂಟ್‌ ಮಾಡುತ್ತಿರುವ ಜನರು, ದೀಪಕ್‌ ಸುಬ್ರಹ್ಮಣ್ಯ ಆಕ್ಟಿಂಗ್‌ ನೆಕ್ಸ್ಟ್‌ ಲೆವೆಲ್‌ ಎನ್ನುತ್ತಿದ್ದಾರೆ. ಇಷ್ಟು ದಿನ ಸೈಕೋ ಅವತಾರ ನೋಡಿ ಬೇಸರವಾಗಿತ್ತು. ಆದರೆ ಈ ಡ್ಯಾನ್ಸ್ , ಆಕ್ಟಿಂಗ್‌ ನೋಡಿದ ನಂತರ ನಿಜಕ್ಕೂ ನಿಮ್ಮ ನಟನೆ ಬಗ್ಗೆ ನನಗೆ ಬಹಳ ಗೌರವ ಉಂಟಾಗುತ್ತಿದೆ. ನಿಮ್ಮ ಆಕ್ಟಿಂಗ್‌ ಅಂತೂ ಬೆಂಕಿ ಎಂದೆಲ್ಲಾ ಜನರು ಕಾಮೆಂಟ್‌ ಮಾಡುತ್ತಿದ್ದಾರೆ.
ವಿಭಾಗ