Honda Overtakes Hero MotoCorp: ತನ್ನ ನಾಯಕನನ್ನೇ ಹಿಂದಕ್ಕೆ ತಳ್ಳಿದ ಹೋಂಡಾ ಕಂಪನಿ: ಹೀರೋ ಕಂಪನಿಗೆ ಬಿಗ್ ಶಾಕ್
ಹೀರೋ, ಹೋಂಡಾ, ಬಜಾಜ್, ಟಿವಿಎಸ್, ಸುಜುಕಿಯಂತಹ ಪ್ರಮುಖ ದ್ವಿಚಕ್ರ ವಾಹನ ಕಂಪನಿಗಳು ಕಾಲಕಾಲಕ್ಕೆ ಹಲವು ನವೀಕರಣಗಳೊಂದಿಗೆ ವಾಹನಗಳನ್ನು ಪರಿಚಯಿಸುತ್ತಿವೆ. ಈ ಪರಿಸ್ಥಿತಿಯಲ್ಲಿ, ಏಪ್ರಿಲ್-ಜುಲೈ ಅವಧಿಯಲ್ಲಿ ಮಾರಾಟವಾದ ವಾಹನಗಳ ಡೇಟಾವನ್ನು ಬಿಡುಗಡೆ ಮಾಡಲಾಗಿದೆ.(ಬರಹ: ವಿನಯ್ ಭಟ್)
ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಭರ್ಜರಿ ಆಗಿ ಮುನ್ನುಗ್ಗುತ್ತಿರುವ ಹೋಂಡಾ ಕಂಪನಿ ತನ್ನ ಪ್ರತಿಸ್ಪರ್ಧಿ ಹೀರೊ ಮೋಟೊಕಾರ್ಪ್ ಅನ್ನು ಮಾರಾಟದಲ್ಲಿ ಹಿಂದಿಕ್ಕಿದೆ. ಇದು ಆಟೋಮೊಬೈಲ್ ಉದ್ಯಮದಲ್ಲಿ ದೊಡ್ಡ ಚರ್ಚೆಯಾಗಿದೆ. ಭಾರತದ ಮಟ್ಟಿಗೆ ಹೇಳುವುದಾದರೆ, ಜನರು ದಿನದಿಂದ ದಿನಕ್ಕೆ ದ್ವಿಚಕ್ರ ವಾಹನಗಳ ಖರೀದಿಗೆ ಹೆಚ್ಚಿನ ಆಸಕ್ತಿ ತೋರಿಸುತ್ತಿದ್ದಾರೆ. ಹೀರೋ, ಹೋಂಡಾ, ಬಜಾಜ್, ಟಿವಿಎಸ್, ಸುಜುಕಿಯಂತಹ ಪ್ರಮುಖ ದ್ವಿಚಕ್ರ ವಾಹನ ಕಂಪನಿಗಳು ಕಾಲಕಾಲಕ್ಕೆ ಹಲವು ನವೀಕರಣಗಳೊಂದಿಗೆ ವಾಹನಗಳನ್ನು ಪರಿಚಯಿಸುತ್ತಿವೆ. ಈ ಪರಿಸ್ಥಿತಿಯಲ್ಲಿ, ಏಪ್ರಿಲ್-ಜುಲೈ ಅವಧಿಯಲ್ಲಿ ಮಾರಾಟವಾದ ವಾಹನಗಳ ಡೇಟಾವನ್ನು ಬಿಡುಗಡೆ ಮಾಡಲಾಗಿದೆ.
ಅಸೋಸಿಯೇಷನ್ ಆಫ್ ಆಟೋಮೊಬೈಲ್ ಮ್ಯಾನುಫ್ಯಾಕ್ಚರರ್ಸ್ ಆಫ್ ಇಂಡಿಯಾ ಬಿಡುಗಡೆ ಮಾಡಿರುವ ಅಂಕಿಅಂಶಗಳ ಪ್ರಕಾರ, ಹೋಂಡಾ ಒಟ್ಟು ದೇಶೀಯ ಮಾರಾಟದಲ್ಲಿ 18.53 ಲಕ್ಷ ಯುನಿಟ್‌ಗಳನ್ನು ಮಾರಾಟ ಮಾಡಿದೆ. ಇದೇ ಅವಧಿಯಲ್ಲಿ ಹೀರೋ ಮೋಟೋ ಕಾರ್ಪ್ ಒಟ್ಟು ದೇಶೀಯ ಮಾರಾಟದಲ್ಲಿ 18.30 ಲಕ್ಷ ಯುನಿಟ್‌ಗಳನ್ನು ಮಾತ್ರ ಸೇಲ್ ಮಾಡಿದೆ. ಇವೆರಡರ ನಡುವಿನ ವ್ಯತ್ಯಾಸವು ಸುಮಾರು 21,653 ಎಂದು ವರದಿಯಾಗಿದೆ.
ಹೋಂಡಾ ಸಗಟು ಮಾರಾಟದಲ್ಲಿ ಮುಂಚೂಣಿಯಲ್ಲಿದ್ದರೂ, ಹಣಕಾಸು ವರ್ಷದ ಚಿಲ್ಲರೆ ಮಾರಾಟದಲ್ಲಿ ಹೀರೋ ಮೋಟೋಕಾರ್ಪ್ ಇನ್ನೂ ಮೊದಲ ಸ್ಥಾನದಲ್ಲಿದೆ ಎಂದು ವರದಿಯಾಗಿದೆ. ಗ್ರಾಮೀಣ ಮತ್ತು ನಗರ ಪ್ರದೇಶಗಳಲ್ಲಿ, ಸ್ಕೂಟರ್ ಮಾದರಿಗಳು ಗೇರ್ ಬೈಕ್‌ಗಳಿಗಿಂತ ಹೆಚ್ಚಿನ ಬೇಡಿಕೆ ಹೊಂದಿವೆ ಎಂದು ಹೇಳಲಾಗಿದೆ. ಮಧ್ಯಪ್ರದೇಶ, ರಾಜಸ್ಥಾನ ಮತ್ತು ಉತ್ತರ ಪ್ರದೇಶದಂತಹ ರಾಜ್ಯಗಳ ವಾಹನ ಮಾರುಕಟ್ಟೆಯಲ್ಲಿನ ಬದಲಾವಣೆಯೇ ಹೋಂಡಾದ ಬೆಳವಣಿಗೆಗೆ ಕಾರಣವಾಗಿದೆ.
ಹೀರೋ ಮೋಟೋಕಾರ್ಪ್ ದೀರ್ಘಕಾಲದವರೆಗೆ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಮುಂಚೂಣಿಯಲ್ಲಿದೆ ಮತ್ತು ಈ ಕುಸಿತವು ಭಾರಿ ಬದಲಾವಣೆಯನ್ನು ಉಂಟುಮಾಡಿದೆ. ಫಾಡಾ ಮಾಹಿತಿಯ ಪ್ರಕಾರ, ಹೋಂಡಾದ ಚಿಲ್ಲರೆ ಮಾರುಕಟ್ಟೆ ಪಾಲು ಏಪ್ರಿಲ್‌ನಲ್ಲಿ 20 ಪ್ರತಿಶತದಿಂದ ಜುಲೈನಲ್ಲಿ 24.3 ಶೇಕಡಾಕ್ಕೆ ಏರಿದೆ. ಅದೇ ರೀತಿ ಹೀರೋ ಷೇರು ಶೇ.33ರಿಂದ ಶೇ.29.4ಕ್ಕೆ ಇಳಿಕೆಯಾಗಿದೆ. ಇದಲ್ಲದೇ ಬಜಾಜ್ 7.5 ಲಕ್ಷ, ಟಿವಿಎಸ್ 10.8 ಲಕ್ಷ ಮತ್ತು ಸುಜುಕಿ 3.5 ಲಕ್ಷ ಮಾರಾಟ ಮಾಡಿದೆ ಎಂದು ವರದಿಯಾಗಿದೆ.
ಇದಲ್ಲದೇ ಇತ್ತೀಚಿನ ದಿನಗಳಲ್ಲಿ ಎಲೆಕ್ಟ್ರಿಕ್ ವಾಹನಗಳ ಮಾರಾಟವೂ ಹೆಚ್ಚಿರುವುದರಿಂದ ಮುಂದಿನ ತ್ರೈಮಾಸಿಕದಲ್ಲಿ ವಾಹನಗಳ ಮಾರಾಟದಲ್ಲಿ ಏನೆಲ್ಲಾ ಬದಲಾವಣೆ ಆಗಲಿದೆ ಎಂಬ ನಿರೀಕ್ಷೆಯೂ ಮೂಡಿದೆ. ಜೊತೆಗೆ ಹಬ್ಬ ಹರಿದಿನಗಳು ಸಮೀಪಿಸುತ್ತಿರುವುದರಿಂದ ಎಲ್ಲ ಉದ್ಯಮಗಳು ಗ್ರಾಹಕರನ್ನು ಸೆಳೆಯಲು ಮತ್ತು ವ್ಯಾಪಾರ ಹೆಚ್ಚಿಸಲು ನಾನಾ ಯೋಜನೆಗಳನ್ನು ರೂಪಿಸಿವೆ.
ವಿಭಾಗ