ಒಂದೆರಡಲ್ಲ, ಹಲವು ದಾಖಲೆಗಳ ಮೇಲೆ ಕಣ್ಣಿಟ್ಟ ಯಶಸ್ವಿ ಜೈಸ್ವಾಲ್; ಹತ್ತಿರದಲ್ಲಿವೆ ವಿರಾಟ್ ಕೊಹ್ಲಿ, ಗವಾಸ್ಕರ್ ರೆಕಾರ್ಡ್ಸ್

ಪ್ರಸ್ತುತ ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಐದು ಪಂದ್ಯಗಳ ಟೆಸ್ಟ್​​​ ಸರಣಿಯಲ್ಲಿ ಅಬ್ಬರಿಸುತ್ತಿರುವ ಟೀಮ್ ಇಂಡಿಯಾದ ಯುವ ಆಟಗಾರ ಯಶಸ್ವಿ ಜೈಸ್ವಾಲ್, ಐದನೇ ಟೆಸ್ಟ್​ ಪಂದ್ಯದಲ್ಲಿ ಹಲವು ದಾಖಲೆಗಳ ಮೇಲೆ ಕಣ್ಣಿಟ್ಟಿದ್ದಾರೆ. ಆಂಗ್ಲರ ಎದುರು ಕಣಕ್ಕಿಳಿದ ನಾಲ್ಕು ಟೆಸ್ಟ್​​ ಪಂದ್ಯಗಳಲ್ಲಿ ಆರಂಭಿಕ ಆಟಗಾರ 93.57ರ ಬ್ಯಾಟಿಂಗ್​ ಸರಾಸರಿಯಲ್ಲಿ 655 ರನ್ ಕಲೆ ಹಾಕುವ ಮೂಲಕ ಸರಣಿಯಲ್ಲಿ ಅತ್ಯಧಿಕ ರನ್ ಗಳಿಸಿದ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

2023ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಡೆಬ್ಯು ಮಾಡಿದ ಈ ಯಂಗ್​ಸ್ಟರ್​, ಮೊದಲ ಪಂದ್ಯದಲ್ಲೇ ಶತಕ ಸಿಡಿಸಿ ಗಮನ ಸೆಳೆದಿದ್ದರು. ಸದ್ಯ ಇಂಗ್ಲೆಂಡ್ ಸರಣಿಯು ಯುವ ಆಟಗಾರನ ಪಾಲಿಗೆ ಇದು 3ನೇ ಟೆಸ್ಟ್​ ಸಿರೀಸ್​ ಆಗಿದೆ. ಸದ್ಯ ಕಣಕ್ಕಿಳಿದ 4 ಟೆಸ್ಟ್​ ಪಂದ್ಯಗಳಲ್ಲಿ ಅನೇಕ ದಾಖಲೆಗಳನ್ನು ತನ್ನ ಹೆಸರಿಗೆ ಬರೆದುಕೊಂಡಿರುವ ಜೈಸ್ವಾಲ್, ಈಗ 5ನೇ ಟೆಸ್ಟ್​ನಲ್ಲೂ ಮತ್ತಷ್ಟು ರೆಕಾರ್ಡ್ಸ್​​​ ಧೂಳೀಪಟಗೊಳಿಸಲು ಸಜ್ಜಾಗಿದ್ದಾರೆ. ಯಶಸ್ವಿ ಮುರಿಯಬಹುದಾದ ದಾಖಲೆ ಪಟ್ಟಿ ಇಲ್ಲಿದೆ.

ವೇಗದ 1000 ರನ್​ ಗಳಿಸಲು ಬೇಕು 29ರನ್

ವಿಶ್ವ ಟೆಸ್ಟ್ ಕ್ರಿಕೆಟ್​​ನಲ್ಲಿ ಅತಿವೇಗದ ಸಾವಿರ ರನ್​ಗಳನ್ನು ಪೂರೈಸಲು ಇನ್ನೂ 29 ರನ್​ಗಳ ಅಗತ್ಯ ಇದೆ. ಮಾರ್ಚ್ 7ರಿಂದ ಆರಂಭವಾಗುವ ಕೊನೆಯ ಟೆಸ್ಟ್​​ ಪಂದ್ಯದಲ್ಲಿ 29 ರನ್ ಕಲೆ ಹಾಕಿದರೆ ಟೆಸ್ಟ್​ ಇತಿಹಾಸದಲ್ಲಿ 1000 ರನ್ ಗಳಿಸಿದ ವಿಶ್ವದ ಮೊದಲ ಬ್ಯಾಟರ್​ ಆಗಲಿದ್ದಾರೆ. ಸದ್ಯ ಚೇತೇಶ್ವರ್ ಪೂಜಾರ ಹೆಸರಿನಲ್ಲಿ ಈ ದಾಖಲೆ ಇದ್ದು, ಕೇವಲ 11 ಟೆಸ್ಟ್​​ಗಳಲ್ಲಿ ಈ ಮೈಲಿಗಲ್ಲಿ ತಲುಪಿದ್ದರು. ಪ್ರಸ್ತುತ ಜೈಸ್ವಾಲ್ 8 ಪಂದ್ಯಗಳಲ್ಲಿ 69.3ರ ಸರಾಸರಿಯಲ್ಲಿ 971 ರನ್ ಗಳಿಸಿದ್ದಾರೆ.

ಟೆಸ್ಟ್​ ಸರಣಿಯಲ್ಲಿ ಇಂಗ್ಲೆಂಡ್ ವಿರುದ್ಧ ಅತಿ ಹೆಚ್ಚು ರನ್

ಪ್ರಸ್ತುತ ಸರಣಿಯಲ್ಲಿ 655 ರನ್ ಗಳಿಸಿರುವ ಜೈಸ್ವಾಲ್ ಇನ್ನೂ 45 ರನ್​ಗಳನ್ನು ತನ್ನ ಖಾತೆಗೆ ಸೇರಿಸಿಕೊಂಡರೆ, ಇಂಗ್ಲೆಂಡ್​​-ಭಾರತ ನಡುವಿನ ಟೆಸ್ಟ್​ ಸರಣಿಯಲ್ಲಿ 700 ಅಥವಾ ಅದಕ್ಕಿಂತ ಅಧಿಕ ರನ್ ಕಲೆ ಹಾಕಿದ ಭಾರತದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ. ಹಾಗೂ ಮೂರನೇ ಆಟಗಾರನಾಗಿ ಈ ಸಾಧನೆ ಮಾಡಲಿದ್ದಾರೆ. ಇಂಡೋ-ಇಂಗ್ಲೆಂಡ್ ಟೆಸ್ಟ್ ಸರಣಿಯಲ್ಲಿ ಅತ್ಯಧಿಕ ರನ್ ಗಳಿಸಿದ ದಾಖಲೆ ಗ್ರಹಾಂ ಕೂಚ್ ಅವರ ಹೆಸರಿನಲ್ಲಿದ್ದು, ಅವರು 752 ರನ್ ಗಳಿಸಿದ್ದರು. ಇದು 1990ರಲ್ಲಿ ನಿರ್ಮಾಣದ ದಾಖಲೆಯಾಗಿತ್ತು.

ಇದನ್ನೂ ಓದಿ: ಭಾರತ, ಪಾಕಿಸ್ತಾನ, ಇಂಗ್ಲೆಂಡ್ ಅಲ್ಲ! ಅಮೆರಿಕ ಸೇರಿ ಟಿ20 ವಿಶ್ವಕಪ್ ಗೆಲ್ಲುವ ನೆಚ್ಚಿನ ಮೂರು ತಂಡಗಳನ್ನು ಹೆಸರಿಸಿದ ಮೈಕಲ್ ವಾನ್

ಕೊಹ್ಲಿ ದಾಖಲೆ ಮುರಿಯಲು ಬೇಕು 1 ರನ್

ಇಂಗ್ಲೆಂಡ್ ವಿರುದ್ಧದ ಐದನೇ ಟೆಸ್ಟ್​ನಲ್ಲಿ ಕೇವಲ 1 ರನ್ ಗಳಿಸಿದರೆ, ಯಶಸ್ವಿ ಜೈಸ್ವಾಲ್ ವಿರಾಟ್​ ಕೊಹ್ಲಿ ದಾಖಲೆ ಮುರಿಯಲಿದ್ದಾರೆ. ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಅತ್ಯಧಿಕ ರನ್ ಗಳಿಸಿದ ದಾಖಲೆ ಕೊಹ್ಲಿ ಹೆಸರಿನಲ್ಲಿದೆ. ಸದ್ಯ 655 ರನ್ ಗಳಿಸಿ ಕೊಹ್ಲಿಯನ್ನು ಸರಿಗಟ್ಟಿರುವ ಜೈಸ್ವಾಲ್ 1 ರನ್ ತನ್ನ ಖಾತೆಗೆ ಸೇರಿಸಿಕೊಂಡರೆ ಇಂಗ್ಲೆಂಡ್ ಎದುರಿನ ಟೆಸ್ಟ್​ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರ ಎಂಬ ದಾಖಲೆಗೆ ಒಳಗಾಗಲಿದ್ದಾರೆ.

ಅತಿ ಹೆಚ್ಚು ಶತಕಗಳು

ವಿರಾಟ್ ಕೊಹ್ಲಿಯ ಮತ್ತೊಂದು ದಾಖಲೆಯನ್ನು ಮುರಿಯಲು ಜೈಸ್ವಾಲ್ ಸಿದ್ಧರಾಗಿದ್ದಾರೆ. ಇನ್ನೊಂದು ಶತಕ ಸಿಡಿಸಿದರೆ, ಇಂಗ್ಲೆಂಡ್ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ಅತಿ ಹೆಚ್ಚು ಸೆಂಚುರಿ ಬಾರಿಸಿದ ಭಾರತದ ಮೂರನೇ ಆಟಗಾರ ಎನಿಸಲಿದ್ದಾರೆ. ಸದ್ಯ ಕೊಹ್ಲಿ ಮತ್ತು ಜೈಸ್ವಾಲ್ ಇಂಗ್ಲೆಂಡ್ ವಿರುದ್ಧ ತಲಾ 2 ಶತಕ ಗಳಿಸಿದ್ದಾರೆ. ಐದನೇ ಟೆಸ್ಟ್‌ನಲ್ಲಿ ಶತಕ ಬಾರಿಸಿದರೆ, ಅವರು ಕೊಹ್ಲಿಯನ್ನು ಮೀರಿಸುತ್ತಾರೆ. ರಾಹುಲ್ ದ್ರಾವಿಡ್ ಮತ್ತು ಮೊಹಮ್ಮದ್ ಅಜರುದ್ದೀನ್ ಜೊತೆ ಜಂಟಿ ದಾಖಲೆಯನ್ನು ಬರೆಯಲಿದ್ದಾರೆ.

ಇದನ್ನೂ ಓದಿ: ಸುನಿಲ್ ಗವಾಸ್ಕರ್ ನಂತರ ಈ ಆಟಗಾರನೇ ಭಾರತದ ಶ್ರೇಷ್ಠ ಓಪನರ್​​ ಎಂದ ರವಿ ಶಾಸ್ತ್ರಿ; ಸೆಹ್ವಾಗ್​ ಕಡೆಗಣಿಸಿದ್ದಕ್ಕೆ ಫ್ಯಾನ್ಸ್ ಕೆಂಡ

ಗವಾಸ್ಕರ್ ದಾಖಲೆ ಮುರಿಯಲು ಬೇಕು 120 ರನ್

ಯಶಸ್ವಿ ಜೈಸ್ವಾಲ್ ಅವರು ಈ ಟೆಸ್ಟ್​​ನಲ್ಲಿ 120 ರನ್​ಗಳಿಸಿದ್ದೇ ಆದರೆ ಭಾರತದ ದಿಗ್ಗಜ ಸುನಿಲ್ ಗವಾಸ್ಕರ್​ ದಾಖಲೆಯನ್ನು ಹಿಂದಿಕ್ಕಲಿದ್ದಾರೆ. ಟೆಸ್ಟ್ ಸರಣಿಯೊಂದರಲ್ಲಿ ಅತ್ಯಧಿಕ ರನ್ ಗಳಿಸಿದ ದಾಖಲೆ ಗವಾಸ್ಕರ್ ಅವರ ಹೆಸರಿನಲ್ಲಿದೆ. ವೆಸ್ಟ್ ಇಂಡೀಸ್​ ವಿರುದ್ಧದ ಟೆಸ್ಟ್ ಸಿರೀಸ್​​ನಲ್ಲಿ ಬರೋಬ್ಬರಿ 774 ರನ್​ಗಳನ್ನು ಗಳಿಸಿದ್ದರು. ಈಗ ಈ ದಾಖಲೆಯನ್ನೂ ಧೂಳಿಪಟಗೊಳಿಸುವ ಅವಕಾಶ ಜೈಸ್ವಾಲ್ ಮುಂದಿದೆ.

ಬ್ರಾಡ್ಮನ್ ದಾಖಲೆ ಮೇಲೂ ಕಣ್ಣು

ಬ್ರಿಟಿಷರ ಎದುರಿನ ಅಂತಿಮ ಹಾಗೂ ಐದನೇ ಟೆಸ್ಟ್​​ನಲ್ಲಿ ದ್ವಿಶತಕ ಸಿಡಿಸಿಲು ಸಾಧ್ಯವಾದರೆ ಡೊನಾಲ್ಡ್ ಬ್ರಾಡ್ಮನ್ ಅವರ ದಾಖಲೆ ಸರಿಗಟ್ಟಲು ಅವಕಾಶ ಪಡೆದಿದ್ದಾರೆ. ದ್ವಿಶತಕ ಸಿಡಿಸಿದ್ದೇ ಆದರೆ ಒಂದೇ ಸರಣಿಯಲ್ಲಿ ಮೂರು ಡಬಲ್ ಸೆಂಚುರಿ ಬಾರಿಸಿದ ವಿಶ್ವದ 2ನೇ ಹಾಗೂ ಭಾರತದ ಮೊದಲ ಬ್ಯಾಟರ್​ ಎಂಬ ಖ್ಯಾತಿಗೆ ಒಳಗಾಗಲಿದ್ದಾರೆ. ಸದ್ಯ ಜೈಸ್ವಾಲ್ ಫಾರ್ಮ್​ ನೋಡಿದರೆ, ಇಷ್ಟು ದಾಖಲೆಗಳ ಪೈಕಿ ಹಲವನ್ನು ತಮ್ಮ ಹೆಸರಿಗೆ ಬರೆದುಕೊಳ್ಳುವುದರಲ್ಲಿ ಯಾವುದೇ ಅನುಮಾನ ಇಲ್ಲ.

ಇದನ್ನೂ ಓದಿ: ರಣಜಿ ಸೆಮೀಸ್​ನಲ್ಲಿ ಸೋತ ತಮಿಳುನಾಡು; ನಾಯಕನ ದೂಷಿಸಿದ ಕೋಚ್​ಗೆ ಹಿಗ್ಗಾಮುಗ್ಗಾ ಜಾಡಿಸಿದ ದಿನೇಶ್ ಕಾರ್ತಿಕ್