ಕುಸಿದ ಭಾರತಕ್ಕೆ ಆಸರೆಯಾದ ಕಿಶನ್-ಹಾರ್ದಿಕ್ ತಲಾ ಅರ್ಧಶತಕ; ಪಾಕ್ ಗೆಲುವಿಗೆ 267 ರನ್‌ಗಳ ಸವಾಲಿನ ಗುರಿ

ಪಾಕಿಸ್ತಾನದ ಮಾರಕ ಬೌಲಿಂಗ್ ದಾಳಿಯ ನಡುವೆಯೂ ಇಶಾನ್ ಕಿಶನ್ ಮತ್ತು ಹಾರ್ದಿಕ್ ಪಾಂಡ್ಯ ಆರ್ಭಟಿಸಿದರು. ಸತತ ವಿಕೆಟ್​ ಪಡೆದು ಅಲ್ಪಮೊತ್ತಕ್ಕೆ ಕಟ್ಟಿಹಾಕುವ ಪಾಕಿಸ್ತಾನದ ಲೆಕ್ಕಾಚಾರವನ್ನು ತಲೆಕೆಳಗಾಗಿಸಿದ ಇಶಾನ್​ ಮತ್ತು ಹಾರ್ದಿಕ್, ಭರ್ಜರಿ ಬ್ಯಾಟಿಂಗ್ ನಡೆಸಿದರು. ಸಂಕಷ್ಟದಲ್ಲಿದ್ದ ಭಾರತ ತಂಡಕ್ಕೆ ನೆರವಾದ ಈ ಜೋಡಿ, ಸತತ ವಿಕೆಟ್​ಗಳ ನಡುವೆಯೂ ನಿರ್ಭೀತವಾಗಿ ಬ್ಯಾಟ್​ ಬೀಸಿ ಸವಾಲಿನ ಮೊತ್ತ ಕಲೆ ಹಾಕಲು ನೆರವಾದರು.

ಬದ್ಧವೈರಿಗಳ ಎದುರು ಹೋರಾಟದ ಆಟವಾಡಿದ ಹಾರ್ದಿಕ್-ಇಶಾನ್ ತಲಾ ಅರ್ಧಶತಕ ಸಿಡಿಸಿ ಮಿಂಚಿದರು. ಅಲ್ಲದೆ, 5ನೇ ವಿಕೆಟ್​ಗೆ ಶತಕದ ಜೊತೆಯಾಟವಾಡಿ ಏಷ್ಯಾಕಪ್ ಇತಿಹಾಸದಲ್ಲಿ ದಾಖಲೆ ಬರೆದರು. ಒಂದು ಹಂತದಲ್ಲಿ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ್ದ ಪಾಕ್​ ಬೌಲರ್​​ಗಳಿಗೆ ಬೆಂಡೆತ್ತಿದಲ್ಲದೆ, ಸ್ಕೋರ್​ ಕಾರ್ಡ್​​ನಲ್ಲಿ ರನ್​​ ತೇರು ಎಳೆದರು. ಪರಿಣಾಮ ಭಾರತ 266 ರನ್​ಗಳ ಚಾಲೆಂಜಿಂಗ್​ ಮೊತ್ತ ಕಲೆ ಹಾಕುವಲ್ಲಿ ನಿರ್ಣಾಯಕ ಪಾತ್ರವಹಿಸಿದರು.

ಆರಂಭಿಕ ಆಘಾತ, 66ಕ್ಕೆ 4 ವಿಕೆಟ್

ಮೊದಲು ಬ್ಯಾಟಿಂಗ್​​ ನಡೆಸಿದ ಟೀಮ್​ ಇಂಡಿಯಾ ಆರಂಭಿಕ ಆಘಾತಕ್ಕೆ ಒಳಗಾಯಿತು. ಮೇಲಿಂದ ಮೇಲೆ ಅಗ್ರ ನಾಲ್ವರು ಬ್ಯಾಟರ್​ಗಳ​​ ವಿಕೆಟ್‌ ಕಳೆದುಕೊಂಡಿತು. ರೋಹಿತ್​ ಶರ್ಮಾ 11 ರನ್, ಶುಭ್ಮನ್ ಗಿಲ್ 10, ವಿರಾಟ್ ಕೊಹ್ಲಿ 4 ರನ್, ಶ್ರೇಯಸ್ ಅಯ್ಯರ್ 14 ರನ್ ಸಿಡಿಸಿ ವೈಫಲ್ಯ ಅನುಭವಿಸಿದರು. ಇವರು ಔಟಾದ ಸಮಯದಲ್ಲಿ ಭಾರತದ ಮೊತ್ತ 66 ಆಗಿತ್ತು. ಶಾಹೀನ್​ ಶಾ ಅಫ್ರಿದಿ, ಹ್ಯಾರಿಸ್ ರವೂಫ್, ನಸೀಮ್ ಶಾ ತ್ರಿವಳಿ ಬೌಲರ್​ಗಳು ಸಂಘಟಿತ ಬೌಲಿಂಗ್ ದಾಳಿ ನಡೆಸಿ ಕುಸಿತಕ್ಕೆ ಕಾರಣರಾಗಿದ್ದರು. ಈ ಹಂತದಲ್ಲಿ150 ರನ್ ಗಳಿಸಲೂ ಸಾಧ್ಯವಾಗದ ಪರಿಸ್ಥಿತಿಗೆ ಭಾರತ ಸಿಲುಕಿತ್ತು.

ತಂಡವನ್ನು ಪಾರು ಮಾಡಿದ ಹಾರ್ದಿಕ್-ಇಶಾನ್

ಈ ಹಂತದಲ್ಲಿ ಹಾರ್ದಿಕ್​-ಇಶಾನ್ ಜವಾಬ್ದಾರಿಯುತ ಮತ್ತು ರಕ್ಷಣಾತ್ಮಕ ಬ್ಯಾಟಿಂಗ್ ನಡೆಸುವ ಮೂಲಕ ಭಾರತ ತಂಡವನ್ನು ಆಧರಿಸಿದರು. ಅಲ್ಲದೆ ಪಾಕಿಸ್ತಾನ ಬೌಲರ್​ಗಳನ್ನು ಕಾಡಿದ ಈ ಬ್ಯಾಟ್ಸ್​​ಮನ್​​ಗಳು, 141 ಎಸೆತಗಳಲ್ಲಿ 138 ರನ್​ ಪೇರಿಸಿದರು. ಆ ಮೂಲಕ ನೆರವಾದ ಈ ಜೋಡಿ, 5ನೇ ವಿಕೆಟ್​ಗೆ ದಾಖಲೆಯ ಶತಕದ ಜೊತೆಯಾಡಿವಾಡಿ ದಿಗ್ಗಜರ ರೆಕಾರ್ಡ್​ ಮುರಿದರು. ಹಾಗೆಯೇ ಸಂಕಷ್ಟದಿಂದ ಪಾರು ಮಾಡಿದರು. ಇವರ ಅಮೋಘ ಬ್ಯಾಟಿಂಗ್‌ ನೆರವಿನಿಂದ 200 ರನ್‌ಗಳ ಗಡಿ ದಾಟುವಲ್ಲಿ ಯಶಸ್ಸು ಕಂಡಿತು.

ತಲಾ ಅರ್ಧಶತಕ ಸಿಡಿಸಿದ ಬಲಗೈ-ಎಡಗೈ ಜೋಡಿ

ಕೆಎಲ್ ರಾಹುಲ್​ಗೆ ಬ್ಯಾಕಪ್ ವಿಕೆಟ್ ಕೀಪರ್​ ಆಗಿ ಆಯ್ಕೆಯಾದ ಇಶಾನ್ ಕಿಶನ್, ಅವರ ಅಲಭ್ಯತೆಯಲ್ಲಿ ತಂಡದಲ್ಲಿ ಸ್ಥಾನ ಪಡೆದು ಟೀಮ್ ಮ್ಯಾನೇಜ್​ಮೆಂಟ್​ ತನ್ನ ಮೇಲೇ ಇಟ್ಟಿದ್ದ ನಂಬಿಕೆಯನ್ನು ಇಶಾನ್‌ ಉಳಿಸಿಕೊಂಡರು. ‌ಅಮೋಘ ಬ್ಯಾಟ್ ನಡೆಸುತ್ತಾ ಶತಕದತ್ತ ಹೆಜ್ಜೆ ಹಾಕುತ್ತಿದ್ದ ಕಿಶನ್, 81 ಎಸೆತಗಳಲ್ಲಿ 9 ಬೌಂಡರಿ, 2 ಸಿಕ್ಸರ್​ಗಳ ಸಹಾಯದಿಂದ 82 ರನ್‌ಗಳ ಅಮೂಲ್ಯ ಕಾಣಿಕೆ ನೀಡಿದರು. ಇದು ಅವರ ಸತತ 4ನೇ ಏಕದಿನ ಅರ್ಧಶತಕ ಎಂಬುದು ವಿಶೇಷ.

ಮತ್ತೊಂದೆಡೆ ಹಾರ್ದಿಕ್​ಗೆ ಅದ್ಭುತ ಸಾಥ್​ ನೀಡಿದ ಹಾರ್ದಿಕ್ ಆರಂಭದಲ್ಲಿ ನಿಧಾನವಾ್ಗಿ ಬ್ಯಾಟ್ ಬೀಸಿದರು. ಕಿಶನ್ ಅರ್ಧಶತಕದ ನಂತರ ಬೌಲರ್​​ಗಳ ಮೇಲೆ ಸವಾರಿ ನಡೆಸಿದ ಹಾರ್ದಿಕ್, ತಾನೂ ಕೂಡ ಭರ್ಜರಿ ಅರ್ಧಶತಕ ಸಿಡಿಸಿ ಮಿಂಚಿದರು. ಹಾರ್ದಿಕ್ ಪಾಂಡ್ಯ 90 ಎಸೆತಗಳಲ್ಲಿ 7 ಬೌಂಡರಿ, 1 ಸಿಕ್ಸರ್​​​ ನೆರವಿನಿಂದ 87 ರನ್ ಗಳಿಸಿ ವಿಕೆಟ್​ ಒಪ್ಪಿಸಿದರು. ಆ ಮೂಲಕ ಫಾರ್ಮ್​ಗೂ ಮರಳಿದರು. ಅಲ್ಲದೆ, ಉಪನಾಯಕನ ಜವಾಬ್ದಾರಿಗೆ ತಕ್ಕಂತೆ ಆಟವಾಡಿ ಗಮನ ಸೆಳೆದರು.

ಜಡೇಜಾ ನಿರಾಸೆ, ಕೊನೆಯಲ್ಲಿ ಪೆವಿಲಿಯನ್ ಪರೇಡ್

ಹಾರ್ದಿಕ್-ಇಶಾನ್ ವಿಕೆಟ್​ ಒಪ್ಪಿಸಿದ ಬೆನ್ನಲ್ಲೇ ರವೀಂದ್ರ ಜಡೇಜಾ ಮತ್ತು ಶಾರ್ದೂಲ್ ಠಾಕೂರ್​ ತಂಡಕ್ಕೆ ನೆರವಾಗುವಲ್ಲಿ ವಿಫಲರಾದರು. ಜಡೇಜಾ 14 ರನ್, ಶಾರ್ದೂಲ್ 3 ರನ್ ಸಿಡಿಸಿ ಔಟಾದರು. ಕುಲ್ದೀಪ್ ಯಾದವ್ 4 ರನ್, ಜಸ್ಪ್ರೀತ್​ ಬುಮ್ರಾ 14 ರನ್ ಕಲೆ ಹಾಕಿ ವಿಕೆಟ್ ಒಪ್ಪಿಸಿದರು. ಮಧ್ಯಮ ಓವರ್​ಗಳಲ್ಲಿ ಹಿಡಿತ ತಪ್ಪಿದ್ದ ಪಾಕ್ ಬೌಲರ್​​​ಗಳು ಕೊನೆಯಲ್ಲಿ ಮತ್ತೆ ಮೇಲುಗೈ ಸಾಧಿಸಿದರು. ಅಂತಿಮವಾಗಿ ಭಾರತ 48.5 ಓವರ್​ಗಳಲ್ಲಿ 266 ರನ್​​ಗಳಿಗೆ ಸರ್ವಪತನ ಕಂಡಿತು. ಶಾಹೀನ್​ ಶಾ ಅಫ್ರಿದಿ 4 ವಿಕೆಟ್, ನಸೀಮ್ ಶಾ, ಹ್ಯಾರಿಸ್ ರವೂಫ್ ತಲಾ 3 ವಿಕೆಟ್ ಪಡೆದು ಮಿಂಚಿದರು.