Women Health: ಮುಟ್ಟಾದಾಗ ಬಿಪಿ ಲೋ ಆಗ್ತಿದೆಯೇ? ಇಲ್ಲಿದೆ ಸುಲಭದ ಪರಿಹಾರ, ಎಲ್ಲದಕ್ಕೂ ಮೊದಲು ಕಾಮ್ ಅಂಡ್ ಕೂಲ್ ಆಗಿ ಮೇಡಮ್
Health Tips for Women: ಪ್ರತಿ ತಿಂಗಳ ಋತುಚಕ್ರವನ್ನು ನಿಭಾಯಿಸುವುದೇ ಮಹಿಳೆಯರ ದೊಡ್ಡ ಸವಾಲು. ಕೆಲವರಿಗೆ ಮುಟ್ಟಿನ ಅವಧಿಯಲ್ಲಿ ಅಂತಹ ದೊಡ್ಡ ಸಮಸ್ಯೆಗಳು ಕಾಣಿಸಿಕೊಳ್ಳುವುದಿಲ್ಲ. ಆದರೆ, ಇನ್ನೂ ಕೆಲ ಮಹಿಳೆಯರು ಆ ಸಮಯದಲ್ಲಿ ತಲೆತಿರುಗುವಿಕೆ ಮತ್ತು ಕಡಿಮೆ ರಕ್ತದೊತ್ತಡವನ್ನು ಅನುಭವಿಸುತ್ತಾರೆ. ಇದನ್ನು ನಿಭಾಯಿಸಲು ಇಲ್ಲಿದೆ ಸಲಹೆ. (ಬರಹ: ಪ್ರಿಯಾಂಕಾ ಗೌಡ)
ಪ್ರತಿ ತಿಂಗಳ ಋತುಚಕ್ರ (Menstruation Cycle)ದ ಸಮಯದಲ್ಲಿ ಬಹುತೇಕ ಹೆಣ್ಣುಮಕ್ಕಳು ಪಡುವ ಕಷ್ಟ ಯಾರಿಗೂ ಬೇಡ. ಮುಟ್ಟಿನ ಸಮಯದಲ್ಲಿ ತುಂಬಾ ಹೊಟ್ಟೆನೋವು, ಸೊಂಟನೋವು, ನಿಶ್ಯಕ್ತಿ ಕಾಡುವುದು ಸಹಜ. ಹೀಗಾಗಿ ಬಹುತೇಕರು ಈ ಅವಧಿಯಲ್ಲಿ ಹೆಚ್ಚಾಗಿ ಮಲಗಿ ವಿಶ್ರಾಂತಿ ಪಡೆಯುತ್ತಾರೆ. ಮುಟ್ಟನ್ನು ನಿಭಾಯಿಸುವುದು ಸ್ವಲ್ಪ ಸವಾಲಿನ ಸಂಗತಿಯೇ ಹೌದು. ಆದರೆ, ಕೆಲವು ಮಹಿಳೆಯರು ಮುಟ್ಟಿನ ಸಮಯದಲ್ಲಿ ಕಡಿಮೆ ರಕ್ತದೊತ್ತಡ (Low Blood Pressure)ದಿಂದ ಬಳಲುತ್ತಾರೆ. ಕುಳಿತಲ್ಲಿಂದ ಎದ್ದಾಗ ತಲೆ ತಿರುಗುವಂತಾಗುವುದು, ಇದ್ದಕ್ಕಿದ್ದಂತೆ ಮೂರ್ಛೆ ತಪ್ಪಿ ಬೀಳುವುದು ಇತ್ಯಾದಿ ಇದರ ಕೆಲವು ಲಕ್ಷಣಗಳಾಗಿವೆ. ನೀವು ಕೂಡ ಇದೇ ಸಮಸ್ಯೆಯಿಂದ ಬಳಲುತ್ತಿದ್ದೀರಾ? ಇದಕ್ಕಾಗಿ ನೀವು ನಿಮ್ಮ ದೇಹವನ್ನು ಹೈಡ್ರೀಕರಿಸಿಕೊಳ್ಳುವುದು ಬಹಳ ಮುಖ್ಯ. ಅಲ್ಲದೆ, ಒತ್ತಡವನ್ನು ನಿರ್ವಹಿಸುವುದು ಮತ್ತು ಕಬ್ಬಿಣದ ಅಂಶವಿರುವ ಆಹಾರವನ್ನು ಸೇವಿಸಬೇಕು. ಇಲ್ಲಿ ಹೇಳಿರುವ ಸಲಹೆಗಳನ್ನು ಪಾಲಿಸುವುದರ ಮೂಲಕ ನಿಮ್ಮ ಮುಟ್ಟಿನ ದಿನಗಳನ್ನು ಆರಾಮದಾಯಕವಾಗಿ ಕಳೆಯಬಹುದು.
ಮುಟ್ಟಿನ ಸಮಯದಲ್ಲಿ ಕಡಿಮೆ ರಕ್ತದೊತ್ತಡದ ಲಕ್ಷಣಗಳು
ಕಡಿಮೆ ರಕ್ತದೊತ್ತಡವು ಒಂದು ಸಾಮಾನ್ಯ ಸಮಸ್ಯೆಯಾಗಿದ್ದು, ಇಂದಿನ ಜೀವನಶೈಲಿಯಲ್ಲಿ ಬಹುತೇಕ ಮಂದಿ ಎದುರಿಸುತ್ತಿರುವ ಒಂದು ಸಾಮಾನ್ಯ ಸಮಸ್ಯೆಯಾಗಿದೆ. ಅದರಲ್ಲೂ ಮುಟ್ಟಿನ ಸಮಯದಲ್ಲಿ ಕೆಲ ಮಹಿಳೆಯರು ಈ ಸಮಸ್ಯೆಯನ್ನು ಎದುರಿಸುತ್ತಿದ್ದಾರೆ. ನಿಮ್ಮ ರಕ್ತದೊತ್ತಡವು ನಿರೀಕ್ಷೆಗಿಂತ ಕಡಿಮೆಯಿದ್ದರೆ, ಇದು ಇತರ ಪರಿಸ್ಥಿತಿಗಳ ಲಕ್ಷಣವಾಗಿ ಸಂಭವಿಸಬಹುದು. ಋತುಚಕ್ರದ ಸಮಯದಲ್ಲಿ ಕಡಿಮೆ ರಕ್ತದೊತ್ತಡದ ಸಾಮಾನ್ಯ ಲಕ್ಷಣ ಹೀಗಿದೆ.
1) ವೇಗವಾಗಿ ಬಡಿದುಕೊಳ್ಳುವ ಹೃದಯ ಬಡಿತ ಅಥವಾ ನಿಧಾನವಾಗುವಿಕೆ
2) ತಲೆತಿರುಗುವಿಕೆ
3) ಮೂರ್ಛೆ ಹೋಗುವುದು
4) ಆಯಾಸ
5) ಮಂದ ದೃಷ್ಟಿ
6) ವಾಕರಿಕೆ ಮತ್ತು ವಾಂತಿ
7) ನಿದ್ರಾಹೀನತೆ
8) ದೌರ್ಬಲ್ಯ, ದಣಿವು ಮತ್ತು ಆಲಸ್ಯದ ಭಾವನೆ
ಮುಟ್ಟಿನ ಸಮಯದಲ್ಲಿ ಕಡಿಮೆ ರಕ್ತದೊತ್ತಡಕ್ಕೆ ಕಾರಣವೇನು?
ಋತುಚಕ್ರದ ಸಮಯದಲ್ಲಿ ತಲೆತಿರುಗುವಿಕೆ, ಮೂರ್ಛೆ ಮತ್ತು ಕಡಿಮೆ ರಕ್ತದೊತ್ತಡವು ಬಹಳಷ್ಟು ಅಸ್ವಸ್ಥತೆ ಮತ್ತು ದೌರ್ಬಲ್ಯವನ್ನು ಉಂಟುಮಾಡಬಹುದು. ಈ ರೋಗಲಕ್ಷಣಗಳ ಕಾರಣಗಳು ಇಲ್ಲಿವೆ,
ಹಾರ್ಮೋನ್ ಬದಲಾವಣೆಗಳು
ಋತುಚಕ್ರದ ಸಮಯದಲ್ಲಿ ದೇಹದಲ್ಲಿನ ಹಾರ್ಮೋನುಗಳ ಏರಿಳಿತಗಳು ನಿಮ್ಮ ರಕ್ತನಾಳಗಳ ಮೇಲೆ ಗಮನಾರ್ಹ ಪ್ರಭಾವವನ್ನು ಉಂಟುಮಾಡುತ್ತವೆ. ಹೀಗಾಗಿ ರಕ್ತದೊತ್ತಡ ಸಮಸ್ಯೆ ಉಂಟಾಗುತ್ತದೆ. ಈಸ್ಟ್ರೊಜೆನ್ ಮತ್ತು ಪ್ರೊಜೆಸ್ಟರಾನ್ ಮಟ್ಟಗಳಲ್ಲಿನ ಬದಲಾವಣೆಗಳು ರಕ್ತದೊತ್ತಡವನ್ನು ಕಡಿಮೆ ಮಾಡುವ ಕಾರಣಗಳಲ್ಲಿ ಒಂದಾಗಿದೆ. ಈಸ್ಟ್ರೊಜೆನ್ ಮಟ್ಟದಲ್ಲಿನ ಕುಸಿತದಿಂದಾಗಿ, ತಲೆತಿರುಗುವಿಕೆ, ಲೋ ಬಿಪಿ ಮತ್ತು ಮೂರ್ಛೆ ತಪ್ಪುವ ಸಮಸ್ಯೆ ಉಂಟಾಗುತ್ತದೆ.
ಹೆಚ್ಚಿನ ರಕ್ತದ ಹರಿವು
ಕೆಲವು ಮಹಿಳೆಯರು ಮುಟ್ಟಿನ ವೇಳೆ ಕಡಿಮೆ ರಕ್ತದ ಹರಿವನ್ನು ಅನುಭವಿಸಿದರೆ, ಇನ್ನೂ ಕೆಲವರಿಗೆ ಮುಟ್ಟಿನ ಸಮಯದಲ್ಲಿ ರಕ್ತದ ಹರಿವು ಹೆಚ್ಚಿರುತ್ತದೆ. ವಿಶೇಷವಾಗಿ ಅಧಿಕ ಅವಧಿಯ ಮಹಿಳೆಯರಲ್ಲಿ ಹೆಚ್ಚಾಗಿ ಈ ಕಡಿಮೆ ರಕ್ತದೊತ್ತಡ ಸಮಸ್ಯೆ ಕಾಣಿಸಿಕೊಳ್ಳಬಹುದು. ತಲೆತಿರುಗುವಿಕೆ ಮತ್ತು ಮೂರ್ಛೆ ತಪ್ಪುವುದು ಇದರಿಂದ ಸಂಭವಿಸುತ್ತದೆ. ಋತುಚಕ್ರದ ಸಮಯದಲ್ಲಿ ಮಹಿಳೆಯರು ಆಯಾಸ ಮತ್ತು ನಿಶ್ಯಕ್ತಿ ಹೊಂದಲು ಸಹ ಇದು ಸಾಮಾನ್ಯ ಕಾರಣವಾಗಿದೆ. ಭಾರಿ ರಕ್ತದ ಹರಿವು ಹೊಂದಿರುವ ಮಹಿಳೆಯರು ಸ್ತ್ರೀರೋಗ ತಜ್ಞರೊಂದಿಗೆ ಸಮಾಲೋಚಿಸುವುದು ಉತ್ತಮ.
ರಕ್ತಹೀನತೆ
ರಕ್ತಹೀನತೆಯು ನಿಮ್ಮ ದೇಹದಾದ್ಯಂತ ಆಮ್ಲಜನಕವನ್ನು ಪರಿಣಾಮಕಾರಿಯಾಗಿ ಸಾಗಿಸಲು ಕಷ್ಟವಾಗುತ್ತದೆ. ಇದು ರಕ್ತದಲ್ಲಿನ ಕೆಂಪು ರಕ್ತ ಕಣಗಳು ಅಥವಾ ಹಿಮೋಗ್ಲೋಬಿನ್ ಕೊರತೆಯ ಸ್ಥಿತಿಯಾಗಿದೆ. ಮುಟ್ಟಿನ ಸಮಯದಲ್ಲಿ, ಮಹಿಳೆಯರು ಗಮನಾರ್ಹ ಪ್ರಮಾಣದ ರಕ್ತವನ್ನು ಕಳೆದುಕೊಳ್ಳಬಹುದು. ಇದು ಕಬ್ಬಿಣದ ಕೊರತೆ ಅಥವಾ ರಕ್ತಹೀನತೆಗೆ ಕಾರಣವಾಗುತ್ತದೆ. ಮುಟ್ಟಿನ ಸಮಯದಲ್ಲಿ ಕಡಿಮೆ ರಕ್ತದೊತ್ತಡವು ರಕ್ತಹೀನತೆಯಿಂದ ಉಂಟಾಗಬಹುದು. ಏಕೆಂದರೆ ಕಡಿಮೆ ಆಮ್ಲಜನಕ ಸಾಗಿಸುವ ಸಾಮರ್ಥ್ಯದಿಂದಾಗಿ ದೇಹವು ಸಾಕಷ್ಟು ರಕ್ತದ ಪ್ರಮಾಣ ಮತ್ತು ಪರಿಚಲನೆಯನ್ನು ನಿರ್ವಹಿಸಲು ಹೆಣಗಾಡುತ್ತದೆ. ಹೀಗಾಗಿ ಮುಟ್ಟಿನ ಸಮಯದಲ್ಲಿ ರಕ್ತಹೀನತೆ ಕಡಿಮೆ ರಕ್ತದೊತ್ತಡಕ್ಕೆ ಕಾರಣವಾಗಬಹುದು ಎಂದು ಅಧ್ಯಯನವೊಂದರಿಂದ ತಿಳಿದು ಬಂದಿದೆ.
ಹೈಪೊಗ್ಲಿಸಿಮಿಯಾ
ಋತುಚಕ್ರದ ಸಮಯದಲ್ಲಿ ಹಾರ್ಮೋನುಗಳ ಅಸಮತೋಲನವು ಹೈಪೊಗ್ಲಿಸಿಮಿಯಾ ಅಥವಾ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಕಡಿಮೆ ಮಾಡಬಹುದು. ಏಕೆಂದರೆ ಈಸ್ಟ್ರೊಜೆನ್ ಹಾರ್ಮೋನ್ ಮಟ್ಟಗಳು ನಿಮ್ಮನ್ನು ಇನ್ಸುಲಿನ್‌ಗೆ ಸಂವೇದನಾಶೀಲವಾಗಿಸುತ್ತದೆ. ಇದು ರಕ್ತದಲ್ಲಿನ ಸಕ್ಕರೆಯ ಮಟ್ಟವನ್ನು ಕಡಿಮೆ ಮಾಡುತ್ತದೆ. ಮಧುಮೇಹ ಇಲ್ಲದವರಿಗಿಂತ ಮಧುಮೇಹ ಹೊಂದಿರುವ ಜನರು ಹೈಪೊಗ್ಲಿಸಿಮಿಯಾಕ್ಕೆ ಹೆಚ್ಚು ಒಳಗಾಗುತ್ತಾರೆ. ಋತುಚಕ್ರದ ಅವಧಿಯಲ್ಲಿ ರಕ್ತದಲ್ಲಿನ ಸಕ್ಕರೆ ಮಟ್ಟದ ಶಕ್ತಿಯ ಉತ್ಪಾದನೆಯನ್ನು ಕಡಿಮೆ ಮಾಡುತ್ತದೆ. ಇದು ಕಡಿಮೆ ರಕ್ತದೊತ್ತಡಕ್ಕೆ ಕಾರಣವಾಗುತ್ತದೆ. ತಲೆತಿರುಗುವಿಕೆ, ನಿಶ್ಯಕ್ತಿ ಮತ್ತು ಮೂರ್ಛೆ ತಪ್ಪುವುದು ಮುಂತಾದ ಲಕ್ಷಣಗಳನ್ನು ಉಂಟುಮಾಡುತ್ತದೆ.
ನಿರ್ಜಲೀಕರಣ
ಈ ಸಮಸ್ಯೆಗೆ ಮತ್ತೊಂದು ಪ್ರಮುಖ ಕಾರಣವೆಂದರೆ ನಿರ್ಜಲೀಕರಣ ಸಮಸ್ಯೆ. ಕೆಲವರು ಕಡಿಮೆ ದ್ರವ ಅಥವಾ ನೀರು ಸೇವಿಸುವುದರಿಂದ ನಿರ್ಜಲೀಕರಣ ಸಮಸ್ಯೆ ಉಂಟಾಗುತ್ತದೆ. ಮುಟ್ಟಿನ ಸಮಯದಲ್ಲಿ ಈ ಸಮಸ್ಯೆಯಿಂದ ಅತಿ ಹೆಚ್ಚಾಗಿ ಬಳಲುತ್ತಾರೆ. ನಿರ್ಜಲೀಕರಣ ಸಮಸ್ಯೆಯು ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ. ತಲೆತಿರುಗುವಿಕೆ, ಮೂರ್ಛೆ ತಪ್ಪುವುದು ಮುಂತಾದ ಸಮಸ್ಯೆಗಳು ಉಂಟಾಗುತ್ತದೆ ಎಂದು ಸಂಶೋಧಕರು ನಡೆಸಿರುವ ಅಧ್ಯಯನದಿಂದ ತಿಳಿದುಬಂದಿದೆ.
ಡಿಸ್ಮೆನೊರಿಯಾ
ತೀವ್ರವಾದ ಮುಟ್ಟಿನ ಸೆಳೆತಗಳು (ಡಿಸ್ಮೆನೊರಿಯಾ) ದೇಹದಲ್ಲಿ ಕೆಲವು ರಾಸಾಯನಿಕಗಳ ಬಿಡುಗಡೆಯನ್ನು ಪ್ರಚೋದಿಸಬಹುದು. ಅದು ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ.
ಮುಟ್ಟಿನ ಸಮಯದಲ್ಲಿ ಲೋ ಬಿಪಿ ಸಮಸ್ಯೆಗೆ ಸುಲಭದ ಪರಿಹಾರಗಳು
ಆಗಾಗ ನೀರು ಕುಡಿಯಿರಿ
ನಿರ್ಜಲೀಕರಣವು ಕಡಿಮೆ ರಕ್ತದೊತ್ತಡವನ್ನು ಉಲ್ಬಣಗೊಳಿಸಬಹುದು. ವಿಶೇಷವಾಗಿ ಋತುಚಕ್ರದ ಅವಧಿಗಳಲ್ಲಿ ಮತ್ತು ಇತರ ರೋಗಲಕ್ಷಣಗಳಾದ ತಲೆತಿರುಗುವಿಕೆ ಮತ್ತು ವಾಕರಿಕೆ ಹೆಚ್ಚಾಗಬಹುದು. ಈ ರೋಗಲಕ್ಷಣಗಳನ್ನು ನಿರ್ವಹಿಸಲು, ಸಾಕಷ್ಟು ನೀರು ಕುಡಿಯುವ ಮೂಲಕ ದೇಹವನ್ನು ಹೈಡ್ರೇಟೆಡ್ ಆಗಿರಿಸಿಕೊಳ್ಳಬೇಕು. ದಿನವೊಂದಕ್ಕೆ ಸುಮಾರು 2 ರಿಂದ 3 ಲೀಟರ್ ನೀರು ಕುಡಿಯುವುದು ಅತ್ಯಗತ್ಯ. ನಿರ್ಜಲೀಕರಣ ಸಮಸ್ಯೆ ಅನುಭವಿಸುತ್ತಿದ್ದರೆ ಓಆರ್‌ಎಸ್ ಅನ್ನು ಸಹ ಕುಡಿಯಬಹುದು. ಏಕೆಂದರೆ ಇದು ಹೈಡ್ರೇಟೆಡ್ ಮಟ್ಟವನ್ನು ಮರುಸ್ಥಾಪಿಸುತ್ತದೆ. ಇದಲ್ಲದೆ, ತೆಂಗಿನ ನೀರು ಮತ್ತು ನಿಂಬೆ ರಸ ಸಹ ಕೂಡ ಬಹಳ ಉಪಯುಕ್ತವಾಗಿದೆ. ಪಾನೀಯಗಳು ಅಥವಾ ತಾಜಾ ಹಣ್ಣಿನ ರಸಗಳನ್ನು ಸಹ ಕುಡಿಯಬಹುದು. ಅತಿಯಾದ ಕೆಫೀನ್ ಮತ್ತು ಆಲ್ಕೋಹಾಲ್‍ನಿಂದ ಮಾತ್ರ ದೂರವಿರಿ. ಏಕೆಂದರೆ ಅವು ನಿರ್ಜಲೀಕರಣಕ್ಕೆ ಕಾರಣವಾಗಬಹುದು.
ಸಕ್ರಿಯರಾಗಿರಿ
ದಿನಕ್ಕೆ ಕನಿಷ್ಠ 30 ನಿಮಿಷಗಳ ಕಾಲ ನಡಿಗೆ, ಯೋಗ, ಧ್ಯಾನ ಅಥವಾ ಆಳವಾದ ಉಸಿರಾಟದ ವ್ಯಾಯಾಮಗಳಂತಹ ಮಧ್ಯಮ ದೈಹಿಕ ಚಟುವಟಿಕೆಗಳಲ್ಲಿ ನಿಯಮಿತವಾಗಿ ತೊಡಗಿಸಿಕೊಳ್ಳಿ. ವ್ಯಾಯಾಮದ ಸಮಯದಲ್ಲಿ, ನಿಮ್ಮ ಹೃದಯ ಬಡಿತವು ಹೆಚ್ಚಾಗಲು ಪ್ರಾರಂಭಿಸುತ್ತದೆ. ನಿಮ್ಮ ಹೃದಯವು ಹೆಚ್ಚು ಆಮ್ಲಜನಕಭರಿತ ರಕ್ತವನ್ನು ಪಂಪ್ ಮಾಡಲು ಮತ್ತು ರಕ್ತದೊತ್ತಡದ ಮಟ್ಟವನ್ನು ಸುಧಾರಿಸಲು ಉತ್ತೇಜಿಸುತ್ತದೆ. ನಿಮ್ಮ ಮುಟ್ಟಿನ ಅವಧಿಯಲ್ಲಿ ಅತಿಯಾದ ಆಯಾಸವನ್ನು ಅನುಭವಿಸಿದರೆ ಶ್ರಮದಾಯಕ ಚಟುವಟಿಕೆಗಳಿಂದ ದೂರವಿರಿ.
ಉಪ್ಪು ಸೇವನೆಯನ್ನು ಹೆಚ್ಚಿಸಿ
ಹೆಚ್ಚಿನ ಉಪ್ಪು ಮತ್ತು ಸೋಡಿಯಂ ಸೇವನೆಯು ಅಧಿಕ ರಕ್ತದೊತ್ತಡದೊಂದಿಗೆ ಸಂಬಂಧಿಸಿದೆ. ಹೀಗಾಗಿ, ಮುಟ್ಟಿನ ಅವಧಿಗಳಲ್ಲಿ ಮಿತವಾದ ಉಪ್ಪು ಸೇವನೆಯು ಕಡಿಮೆ ರಕ್ತದೊತ್ತಡವನ್ನು ನಿರ್ವಹಿಸಲು ಸಹಾಯ ಮಾಡುತ್ತದೆ.
ಕಂಪ್ರೆಷನ್ ಸಾಕ್ಸ್
ಕಂಪ್ರೆಷನ್ ಸಾಕ್ಸ್ ಧರಿಸುವುದು ಪಿರಿಯಡ್ಸ್‌ನಿಂದ ಉಂಟಾಗುವ ಕಡಿಮೆ ರಕ್ತದೊತ್ತಡವನ್ನು ನಿರ್ವಹಿಸಲು ಸಹಾಯ ಮಾಡುತ್ತದೆ ಎಂದು ಅಧ್ಯಯನವೊಂದರಿಂದ ತಿಳಿದುಬಂದಿದೆ. ಇದು ಕಾಲುಗಳು ಮತ್ತು ಕಣಕಾಲುಗಳಂತಹ ಪ್ರದೇಶಗಳಿಗೆ ಮೃದುವಾದ ಒತ್ತಡವನ್ನು ಅನ್ವಯಿಸುವ ಮೂಲಕ ಕಾಲುಗಳಲ್ಲಿ ರಕ್ತ ಪರಿಚಲನೆ ಸುಧಾರಿಸಲು ಸಹಾಯ ಮಾಡುತ್ತದೆ.
ಒತ್ತಡವನ್ನು ನಿರ್ವಹಿಸಿ
ಒತ್ತಡವು ಅಧಿಕ ರಕ್ತದೊತ್ತಡಕ್ಕೆ ಉಂಟಾಗುವ ಕಾರಣಗಳಲ್ಲಿ ಒಂದಾಗಿದೆ. ಆದರೆ, ಇದು ಕಡಿಮೆ ರಕ್ತದೊತ್ತಡ ಮತ್ತು ಮುಟ್ಟಿನ ಅಸ್ವಸ್ಥತೆಯ ಲಕ್ಷಣಗಳನ್ನು ಇನ್ನಷ್ಟು ಹದಗೆಡಿಸುತ್ತದೆ. ನಿಮ್ಮ ಮುಟ್ಟಿನ ಅವಧಿಯಲ್ಲಿ ಒತ್ತಡದ ಮಟ್ಟವನ್ನು ನಿರ್ವಹಿಸಲು ಸಹಾಯ ಮಾಡಲು ಆಳವಾದ ಉಸಿರಾಟ, ಧ್ಯಾನ, ಯೋಗ ಇತ್ಯಾದಿ ವಿಶ್ರಾಂತಿ ತಂತ್ರಗಳನ್ನು ಅಭ್ಯಾಸ ಮಾಡಿ.
ಸಮತೋಲಿತ ಊಟವನ್ನು ಸೇವಿಸಿ
ದಿನವಿಡೀ ಸ್ವಲ್ಪ ಸ್ವಲ್ಪ ಅಥವಾ ಆಗಾಗ್ಗೆ ಊಟ ಮಾಡುವುದರಿಂದ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಸ್ಥಿರಗೊಳಿಸಲು ಮತ್ತು ರಕ್ತದೊತ್ತಡದ ಕುಸಿತವನ್ನು ತಡೆಯಲು ಸಹಾಯ ಮಾಡುತ್ತದೆ. ದೇಹಕ್ಕೆ ಶಕ್ತಿಯನ್ನು ಒದಗಿಸಲು ಮತ್ತು ಹೈಪೊಗ್ಲಿಸಿಮಿಯಾವನ್ನು ತಡೆಗಟ್ಟಲು ಸಂಕೀರ್ಣ ಕಾರ್ಬೋಹೈಡ್ರೇಟ್‌ಗಳು, ಪ್ರೊಟೀನ್‌ಗಳು ಮತ್ತು ಆರೋಗ್ಯಕರ ಕೊಬ್ಬನ್ನು ನಿಮ್ಮ ಆಹಾರದಲ್ಲಿ ಸೇರಿಸಿ.
ಕಬ್ಬಿಣ ಅಂಶವಿರುವ ಆಹಾರಗಳು
ಭಾರಿ ಮುಟ್ಟಿನ ರಕ್ತಸ್ರಾವವು ಕಬ್ಬಿಣದ ನಷ್ಟ ಮತ್ತು ರಕ್ತಹೀನತೆಗೆ ಕಾರಣವಾಗಬಹುದು. ಇದು ಕಡಿಮೆ ರಕ್ತದೊತ್ತಡದ ಲಕ್ಷಣಗಳನ್ನು ಉಲ್ಬಣಗೊಳಿಸುತ್ತದೆ. ಕಬ್ಬಿಣದ ಮಟ್ಟವನ್ನು ಕಾಪಾಡಿಕೊಳ್ಳಲು ಮತ್ತು ಆರೋಗ್ಯಕರ ರಕ್ತ ಪರಿಚಲನೆಯನ್ನು ಸುಧಾರಿಸಲು ಪಾಲಕ್, ಮಾಂಸ, ಬೀನ್ಸ್ ಮತ್ತು ಧಾನ್ಯಗಳಂತಹ ಕಬ್ಬಿಣದ ಅಂಶವಿರುವ ಆಹಾರಗಳನ್ನು ಸೇವಿಸಿ.
